Lufta në Iran është një “gabim katastrofik” që shkel të drejtën ndërkombëtare, tha presidenti i Gjermanisë të martën, në një kritike të pazakontë ndaj politikës së jashtme të Presidentit amerikan Donald Trump, të cilën e përshkroi si një prishje të marrëdhënieve gjermano-amerikane me aleatin e tyre më të madh pas Luftës së Dytë Botërore.

Në një ngjarje në Gjermani, Frank-Walter Steinmeier, i cili me rolin e tij kryesisht ceremonial mund të flasë më lirshëm se politikanët tjerë, mori një qëndrim shumë më kritik sesa kancelari Friedrich Merz, i cili ka shmangur pyetje mbi ligjshmërinë e luftës.

“Politika jonë e jashtme nuk bëhet më bindëse thjesht sepse nuk e quajmë shkelje të së drejtës ndërkombëtare një shkelje të së drejtës ndërkombëtare”,  tha Steinmeier, ish-ministër i jashtëm nga Partia Socialdemokrate qendrore e majtë, në një fjalim në ministrinë e jashtme, raporton Reuters.

“Ne duhet ta trajtojmë këtë në lidhje me luftën në Iran. Sepse, sipas mendimit tim, kjo luftë është në kundërshtim me të drejtën ndërkombëtare,” shtoi ai, duke theksuar se kishte pak dyshime që justifikimi i natyrës së menjëhershme të një sulmi ndaj objektivave amerikane nuk qëndron.

Duke e quajtur luftën të panevojshme dhe një “gabim katastrofik politikisht”, Steinmeier tha se mandati i dytë i Trump shënoi një prishje në marrëdhëniet e jashtme gjermane po aq të thellë sa pushtimi i Ukrainës nga Rusia.

“Ashtu si besoj se nuk do të ketë kthim në marrëdhëniet me Rusinë para 24 shkurtit 2022, po ashtu besoj se nuk do të ketë kthim në marrëdhëniet transatlantike para 20 janarit 2025,” tha Steinmeier, transmeton në shqip gazeta online Reporteri.net.