Ekuipazhi i anijes kozmike Artemis II ka udhëtuar distancën më të largët në hapësirë nga Toka, duke thyer rekordin e vendosur nga misioni Apollo 13.

Në njoftimin e lëshuar nga NASA thuhet se astronautët pritet të afrohen më së shumti me Hënën rreth orës 7:02 pasdite, që tek ne i bie rreth orës 01:02 e mëngjesit.

“Astronautët e misionit Artemis II kanë thyer rekordin për distancën më të madhe nga Toka në orën 1:56 pasdite EDT (17:56 UTC). Ky rekord më parë ishte vendosur gjatë misionit Apollo 13, kur astronautët udhëtuan 248,655 milje larg Tokës. Hëna vazhdon të bëhet gjithnjë e më e madhe në dritaret e anijes kozmike Orion, ndërsa misioni Artemis II përgatitet për të vëzhguar anën e largët. Astronautët pritet të afrohen më së shumti me Hënën rreth orës 7:02 pasdite EDT (23:02 UTC)”, thuhet në njoftimin e NASA’s.

Ekuipazhi i Artemis II mori një mesazh të veçantë sot nga Jim Lovell, një nga vetëm tre personat që kanë udhëtuar dy herë në Hënë.

Një video në llogarinë në X të NASA-s përmban një mesazh të pararegjistruar nga piloti i Apollo 8, i cili ishte gjithashtu një nga anëtarët e ekuipazhit të Apollo 13.