“Reuters” ka raportuar sot për një email të brendshëm të Pentagonit që përshkruan opsione për Shtetet e Bashkuara për të ndëshkuar aleatët e NATO’s që nuk kanë mbështetur operacionet amerikane në luftën me Iranin, duke përfshirë pezullimin e Spanjës nga aleanca dhe rishikimin e qëndrimit të SHBA’së ndaj pretendimit të Britanisë për Ishujt Falkland, përcjell Reporteri.net.

Në artikull, Reuters i referohet një zyrtari amerikan, që ka folur në kushte anonimiteti për përmbajtjen e e-mailit.

Opsionet e politikës janë të detajuara në një shënim që shpreh frustrim ndaj hezitimit ose refuzimit të disa aleatëve për t’i dhënë Shteteve të Bashkuara qasje, baza dhe të drejta fluturimi mbi territor (të njohura si ABO) për luftën me Iranin, ka thënë zyrtari.

Emaili theksonte se ABO është “thjesht minimumi absolut për NATO-n”, sipas zyrtarit, i cili shtoi se opsionet po qarkullonin në nivele të larta në Pentagon.

Një nga opsionet e përmendura në email parashikon pezullimin e vendeve “problematike” nga pozicione të rëndësishme ose prestigjioze në NATO, citohet të ketë thënë zyrtari.

Presidenti Donald Trump ka kritikuar ashpër aleatët e NATO-s për mosdërgimin e flotave të tyre detare për të ndihmuar në hapjen e Ngushticës së Hormuzit, e cila u mbyll për transportin global pas fillimit të luftës ajrore më 28 shkurt.

Ai ka deklaruar gjithashtu se po shqyrton mundësinë e tërheqjes nga aleanca.

“A nuk do ta bënit edhe ju po të ishit në vendin tim?” pyeti Trump Reuters në një intervistë të 1 prillit, në përgjigje të një pyetjeje nëse tërheqja e SHBA-së nga NATO ishte një mundësi.

Por emaili nuk sugjeron që Shtetet e Bashkuara ta bëjnë një gjë të tillë, tha zyrtari. Ai gjithashtu nuk propozon mbylljen e bazave në Evropë.

Zyrtari nuk pranoi të thoshte nëse opsionet përfshinin një reduktim të mundshëm të forcave amerikane në Evropë, megjithatë.

I pyetur për koment lidhur me emailin, zëdhënësi për shtyp i Pentagonit, Kingsley Wilson, ka deklaruar:

“Siç ka thënë Presidenti Trump, pavarësisht gjithçkaje që Shtetet e Bashkuara kanë bërë për aleatët e tyre në NATO, ata nuk ishin aty për ne. Departamenti i Luftës do të sigurojë që Presidenti të ketë opsione të besueshme për të garantuar që aleatët tanë të mos jenë më një ‘tigër prej letre’, por të bëjnë pjesën e tyre. Nuk kemi komente të mëtejshme mbi diskutimet e brendshme në këtë drejtim”, ka deklaruar Wilson.

Lufta SHBA–Izrael me Iranin ka ngritur pikëpyetje serioze mbi të ardhmen e aleancës 76-vjeçare dhe ka shkaktuar shqetësim të paprecedentë se SHBA mund të mos vijë në ndihmë të aleatëve evropianë nëse ata sulmohen, thonë analistë dhe diplomatë.

Britania, Franca dhe vende të tjera thonë se bashkimi me bllokadën detare të SHBA-së do të nënkuptonte hyrje në luftë, por se do të ishin të gatshme të ndihmonin për të mbajtur të hapur Ngushticën sapo të arrihej një armëpushim i qëndrueshëm ose të përfundonte konflikti.

Megjithatë, zyrtarët e administratës Trump kanë theksuar se NATO nuk mund të jetë një rrugë njëkahëshe.

Ata kanë shprehur frustrim ndaj Spanjës, ku udhëheqja socialiste ka deklaruar se nuk do të lejojë përdorimin e bazave apo hapësirës ajrore të saj për të sulmuar Iranin. Shtetet e Bashkuara kanë dy baza të rëndësishme ushtarake në Spanjë: Stacionin Detar Rota dhe Bazën Ajrore Morón.

Opsionet e politikës të përshkruara në email synojnë të dërgojnë një sinjal të fortë tek aleatët e NATO-s me qëllim “uljen e ndjenjës së të qenit të privilegjuar nga ana e evropianëve”, tha zyrtari, duke përmbledhur përmbajtjen e emailit./Reporteri.net