Milioneri amerikan dhe gjuetari i kafshëve të egra Ernie Dosio, 75 vjeç, ka vdekur pasi u shkel nga një tufë elefantësh gjatë një ekspedite gjuetie në Gabon. Dosio, një pronar vreshtash nga Kalifornia, u vra të premten e kaluar ndërsa gjuante një specie antilope në pyllin tropikal të Afrikës Qendrore, raporton The Guardian.

Sipas raportimeve, Dosio dhe udhërrëfyesi i tij ishin në pyllin tropikal Lope-Okanda duke gjuajtur antilopën duikere, një antilopë që konsiderohet pothuajse e kërcënuar për shkak se popullata e saj po zvogëlohet, kur ata hasën papritur pesë elefantë me një të vogël.

Dosio u vra në sulmin ndaj kafshës, ndërsa guida i tij, një gjuetar profesionist, pësoi lëndime të rënda. Operatori i safarit Collect Africa konfirmoi vdekjen e klientit të tij.

Dosio, me origjinë nga Lodi i Kalifornisë, kishte kaluar vite duke ndërtuar një koleksion të gjerë trofesh gjuetie, duke përfshirë kafshë të tilla si elefantë dhe luanë. Ai konsiderohej një emër i njohur në rrethet e Klubit Safari të Sakramentos. Ai ishte pronar i Pacific AgriLands Inc., e cila operon 12,000 hektarë vreshta në Modesto.

Zyrtarët në Ambasadën e SHBA-së në Gabon po koordinojnë tani kthimin e eshtrave të tij në Kaliforni.