428 aktivistët e “Global Sumud Flotilla”, të ndaluar nga marina izraelite në ujërat ndërkombëtare pranë Gazës, kanë mbërritur në portin e Ashdod-it. Lajmi u konfirmua nga ministri i Jashtëm izraelit, Gideon Sa’ar, i cili deklaroi se aktivistët janë transferuar në anije izraelite dhe po dërgohen në Izrael, ku do të kenë mundësi të kontaktojnë përfaqësuesit konsullorë.

Ndërkohë, organizata ligjore Adalah bëri të ditur se avokatët e saj morën akses në port vetëm pas disa orësh pritjeje dhe presioni ndaj autoriteteve izraelite.

“Ndërhyrja, transferimi me forcë në Izrael dhe pengimi i një misioni humanitar përbëjnë shkelje të rëndë të së drejtës ndërkombëtare”, deklaroi Adalah, duke shtuar se 87 aktivistë kanë nisur grevë urie në shenjë proteste.

Aktivistët në pritje të marrjes në pyetje

Grupi i parë prej 330 personash kishte mbërritur që një ditë më parë në radën e portit, por autoritetet izraelite i mbajtën në pritje deri mëngjesin e sotëm. Një grup i dytë pritet të zbarkojë gjatë pasdites.

Mes të ndaluarve ndodhen 29 shtetas italianë, përfshirë deputetin e Lëvizjes 5 Yjet, Dario Carotenuto, si dhe tre rezidentë të huaj në Itali.

Sipas autoriteteve izraelite, aktivistët do t’i nënshtrohen procedurave të identifikimit dhe marrjes në pyetje, të cilat pritet të zgjasin të paktën gjashtë orë.

Italia kërkon lirimin e shtetasve të saj

Ministri i Jashtëm italian Antonio Tajani ka kërkuar lirimin sa më të shpejtë të qytetarëve italianë dhe garantimin e sigurisë së tyre.

“Qytetarët italianë, përfshirë një deputet dhe një gazetar, duhet të lejohen të largohen sa më parë”, deklaroi Farnesina.

Izraeli aplikon procedurë të përshpejtuar dëbimi

Sipas mediave italiane, ndaj aktivistëve pritet të zbatohet procedura e përshpejtuar e dëbimit, e miratuar nga Knesset në fund të marsit. Ligji lejon nisjen e menjëhershme të procedurës së dëbimit për personat që akuzohen për hyrje të paligjshme në territorin izraelit.

Megjithatë, avokatët theksojnë se ndërhyrja ndaj flotiljes ka ndodhur në ujëra ndërkombëtare, rreth 200 milje larg Gazës.

Frikë për ndalime më të gjata

Shqetësimi më i madh lidhet me mundësinë që disa aktivistë të mbahen më gjatë në paraburgim, sidomos ata që Izraeli i konsideron “recidivistë”, palestinezët apo shtetasit e vendeve që Tel Avivi i cilëson si armiqësore.

Kjo frikë lidhet edhe me rastin e fundit të drejtuesve të flotiljes, Thiago Àvila dhe Saif Abukeshek, të cilët u mbajtën për më shumë se një javë në Ashkelon nën dyshime për lidhje me organizata terroriste, edhe pse më pas u liruan pa akuza formale.

Paralelisht me zhvillimet në Ashdod, probleme po has edhe “Land Convoy”, autokolona humanitare tokësore me kamionë ndihmash dhe ambulanca, e cila është bllokuar prej ditësh në Sirte të Libisë.

Konvoji, ku ndodhen rreth 100 aktivistë, përfshirë mjekë, paramedikë dhe rreth 20 italianë, pret garanci sigurie nga autoritetet e Libisë lindore për të kaluar drejt Cirenaikës.

Organizatorët deklarojnë se kishin marrë më herët autorizime për kalim të sigurt, por situata ndryshoi papritur më 17 maj, kur autokolona u ndalua nga forcat ushtarake pranë Sirtes.