Lideri i ri Suprem i Iranit ka lëshuar një paralajmërim rrëqethës ndaj Presidentit të SHBA-së, Donald Trump, duke deklaruar se forcat e huaja nuk kanë vend në Gji “përveçse në fund të ujërave të tij”.

Mesazhi sfidues nga Ayatollah Mojtaba Khamenei vjen në një kohë kur bisedimet e tensionuara për paqen, me qëllim përfundimin e luftës tremujore, kanë ngecur për shkak të izolimit të tij ekstrem.

Khamenei mori pushtetin pasi babai i tij, Ayatollah Ali Khamenei, u vra në një sulm ajror të përbashkët SHBA-Izrael më 28 shkurt. I plagosur lehtë në atë sulm, lideri i ri raportohet se po fshihet në një vend të panjohur për t’i shpëtuar asgjësimit.

Sipas zyrtarëve amerikanë, ai po qeveris përmes një “labirinti korrierësh” fizikë për të shmangur zbulimin elektronik, çka do të thotë se nevojiten ditë të tëra që mesazhet e tij të mbërrijnë te negociatorët.

Megjithatë, ai përdori kanalin e tij në Telegram për të lëshuar një paralajmërim të ashpër se rajonet e Gjirit nuk do të shërbejnë më si mburojë për Uashingtonin.

Ai deklaroi: “Shtetet e Gjirit nuk do të jenë më një mburojë për bazat ushtarake amerikane dhe Shtetet e Bashkuara nuk do të kenë më një ‘strehë të sigurt’ në këtë rajon.”

Frustrimi i Trumpit me zvarritjet e Teheranit erdhi në pikën e vlimit këtë javë, teksa ai thirri krerët e mbrojtjes në Shtëpinë e Bardhë për të shqyrtuar objektiva të reja bombardimi – duke përfshirë industrinë e naftës së Iranit, vendet e rindërtuara të lëshimit të raketave dhe rezervat e mbetura të uraniumit.

Në një postim në rrjetet sociale gjatë fundjavës, Trump shkroi: “Isha gati të urdhëroja një sulm shumë të madh nesër. E kam shtyrë për pak kohë, shpresoj, ndoshta përgjithmonë, por mundësisht për një kohë të shkurtër.”

Ai shtoi: “U pyeta nga Arabia Saudite, Katari, Emiratet e Bashkuara Arabe dhe disa të tjerë nëse mund ta shtynim për dy ose tre ditë, një periudhë e shkurtër kohore, sepse ata mendojnë se janë shumë afër arritjes së një marrëveshjeje.”

Por Trump këmbënguli se një “sulm i plotë dhe në shkallë të gjerë” është i garantuar nëse një marrëveshje nuk arrihet.

Pika kryesore e bllokadës mbetet urdhri i prerë i Mojtaba Khameneit që rezervat e Iranit prej rreth 440 kg uranium të pasuruar pothuajse në nivel ushtarak “nuk duhet të largohen nga vendi”, duke refuzuar kështu një kërkesë kyçe të SHBA-së.

Zyrtarët e administratës amerikane thonë se forcat e tyre mbeten të pozicionuara dhe të gatshme për të goditur nëse bisedimet dështojnë përfundimisht.