Ministria e Jashtme e Iranit ka deklaruar se SHBA-ja e ka shkelur armëpushimin në rajonin e Hormozganit, pranë Ngushticës së Hormuzit, raporton Reuters.

Ministria tha se Irani do të përgjigjet dhe nuk do të hezitojë të mbrojë veten.

Ushtria amerikane kreu sulme të hënën në jug të Iranit ndaj objektivave, përfshirë anije që po tentonin të vendosnin mina dhe pozicione për lëshimin e raketave, duke i përshkruar ato si veprime mbrojtëse.

“SHBA-ja ka kryer një shkelje të rëndë të armëpushimit në rajonin e Hormozganit gjatë 48 orëve të fundit … Irani e mban regjimin amerikan përgjegjës për të gjitha pasojat që rrjedhin nga këto veprime agresive dhe të pajustifikuara”, thuhet në deklaratën e Ministrisë së Jashtme të Iranit.

Forcat amerikane sulmuan të hënën pozicione raketore në jug të Iranit dhe anije që po përpiqeshin të vendosnin mina, tha Komanda Qendrore e SHBA-së, ndërsa negociatorët kryesorë iranianë mbërritën në Doha për bisedime me synim përfundimin e luftës.

Sulmet rrezikuan një armëpushim tashmë të brishtë që kishte nisur më 8 prill dhe erdhën në kohën kur negociatori kryesor i Iranit dhe ministri i Jashtëm ndodheshin në Doha për bisedime me kryeministrin e Katarit mbi një marrëveshje të mundshme për t’i dhënë fund luftës, citoi Reuters një zyrtar të ketë thënë.

Ndërkohë, Donald Trump tha se bisedimet me Iranin po shkonin “mirë”, por paralajmëroi për sulme të reja nëse ato dështonin. “Do të jetë vetëm një marrëveshje e madhe për të gjithë, ose nuk do të ketë fare marrëveshje”, tha presidenti amerikan në rrjetet sociale.

Sekretari amerikan i Shtetit, Marco Rubio, i cili ndodhet në Indi, tha të martën se Ngushtica e Hormuzit duhet të hapet “në një mënyrë ose në një tjetër”.

“Ajo që po ndodh atje është e paligjshme, është ilegale, është e paqëndrueshme për botën, është e papranueshme”, u citua ai t’u ketë thënë gazetarëve. Rubio tha se formulimi negociues i marrëveshjes me Iranin mund “të marrë disa ditë”./Reporteri.net/