Një dron detar ukrainas shpërtheu në portin e Konstancës në Rumani, duke shkaktuar alarm të madh, por pa lënë viktima apo dëme të konsiderueshme.

Ngjarja vjen vetëm një javë pasi një dron rus u përplas në një ndërtesë banimi në qytetin rumun Galați, duke treguar se lufta mes Rusisë dhe Ukrainës po vazhdon të ketë pasoja edhe për vendet fqinje.

Sipas autoriteteve rumune, droni i shpërthyer ishte i tipit Magura, i prodhuar nga Ukraina, dhe mbante rreth 500 kilogramë lëndë shpërthyese. Përpara shpërthimit, rreth 3 mijë persona u evakuuan nga zonat përreth, falë një njoftimi paraprak të dhënë nga autoritetet ukrainase. Ministri rumun i Mbrojtjes, Radu Miruță, deklaroi se Kievi kishte informuar Bukureshtin edhe për kohën e saktë kur droni do të vetëshkatërrohej.

Marina ukrainase konfirmoi se droni ishte pjesë e flotës së saj dhe se kishte humbur kontrollin për shkak të ndërhyrjeve të luftës elektronike ruse. Si pasojë, ai kishte dalë nga kursi dhe ishte zhvendosur drejt brigjeve rumune.

Mediat rumune raportuan gjithashtu se një tjetër dron detar shpërtheu pranë portit të Konstancës, ndërsa dy të tjerë shpërthyen në ujërat territoriale të Ukrainës në Detin e Zi. Sipas disa burimeve, grupi fillestar përbëhej nga pesë dronë detarë.

Presidenti i Rumanisë, Nicușor Dan, deklaroi se autoritetet ishin në dijeni të situatës dhe se nuk ekziston asnjë rrezik për qytetarët rumunë apo për infrastrukturën kombëtare. Ai theksoi se incidente të tilla janë pasojë direkte e luftës së nisur nga Rusia kundër Ukrainës dhe se vendi do të vazhdojë të mbajë nivel të lartë vigjilence. Ndërkohë, ambasada ruse në Rumani deklaroi se dronët ishin ukrainas dhe hodhi poshtë çdo përpjekje për të lidhur incidentin me Rusinë.

Ngjarja shkaktoi reagime edhe nga Bashkimi Evropian. Presidenti i Këshillit Europian, António Costa, shprehu solidaritet të plotë me Rumaninë, duke e cilësuar incidentin si pasojë të drejtpërdrejtë të agresionit rus ndaj Ukrainës. Ndërsa presidentja e Komisionit Europian, Ursula von der Leyen, nënvizoi nevojën për investime më të mëdha në mbrojtjen ajrore dhe sistemet kundër dronëve.

Edhe përfaqësuesja e lartë e BE-së për politikën e jashtme, Kaja Kallas, deklaroi se përgjegjësia përfundimtare për situata të tilla bie mbi Rusinë dhe se Bashkimi Evropian do të vazhdojë të forcojë mbështetjen për Ukrainën dhe sigurinë e vendeve anëtare.

Rumania, anëtare e NATO-s dhe e Bashkimit Evropian, ndan një kufi prej rreth 650 kilometrash me Ukrainën dhe ka raportuar dhjetëra shkelje të hapësirës së saj ajrore nga dronë gjatë viteve të fundit, si pasojë e luftës në rajonin e Detit të Zi.