Bekim Sejdiu është përzgjedhur nga Lëvizja Vetëvendosje dhe Lidhja Demokratike e Kosovës për President të vendit.

Kryeministri në detyrë, kryetari i Lëvizjes Vetëvendosje, Albin Kurti dhe kryetari i Lidhjes Demokratike të Kosovës, Lumir Abdixhiku dolën në një konferencë për media së bashku me kandidatin për President.

“Dy partitë [VV-LDK] kanë arritur një pajtueshmëri për emrin tim si kandidat presidencial. Kjo gjithsesi më bën të ndjehem i nderuar”, tha ai, ndërsa i falënderoi dy liderët.

“Më bën të nderuar besimi që të dyja partitë më kanë dhënë, është nder i madh. Duke qenë i vetëdijshëm për barrën e përgjegjësinë që e sjell posti i presidentit, por edhe me kontekstin aktual politik, jam vu në shërbim të Republikës dhe qytetarëve tanë që të shërbej me devotshmëri”, ka thënë ai.

Ai tha se nuk mund të përgjigjet në pyetjet e gazetarëve, ndërsa shtoi se “procesi politik zhvillohet nga subjektet politike, ndërsa procedura kushtetuese në Kuvendin e Republikës së Kosovës dihet”.

Sejdiu tha se motivi i tij i parë ka qenë që të vihet “në shërbim të Republikës së Kosovës”.

Ai tha se shpreson dhe beson që Kosova “do të gjejë rrugë për të ecur përpara, për t’u përballur me sfidat e mëdha që na presin”.