Politikani bavarez Hubert Aiwanger u gjet i vdekur në një hotel në Berlin të mërkurën. Ai ishte 55 vjeç.
Aiwanger ishte Ministër i Ekonomisë i Bavarisë dhe kryetar i partisë populiste të krahut të djathtë, “Votuesit e Lirë” (Freie Wähler). Rrethanat e vdekjes së tij mbeten ende të paqarta.
Aiwanger shërbente si zëvendëskryeministër i Bavarisë, Ministër i Ekonomisë dhe kryetar i partisë populiste të krahut të djathtë, “Votuesit e Lirë”.
Çfarë dihet deri më tani për vdekjen e Hubert Aiwanger-it?
Rrethanat që lidhen me vdekjen e Aiwanger-it janë ende të paqarta. Policia dhe prokuroria në kryeqytetin gjerman kanë nisur një hetim.
Të mërkurën në mbrëmje, hetuesit deklaruan se qëllimi është “të përcaktohet shkaku konkret i vdekjes dhe rrethanat përreth saj, si dhe të përjashtohet mundësia e ndonjë veprimi kriminal”.
Sipas gazetës gjermane “Bild”, Aiwanger nuk ishte ndjerë mirë gjatë së mërkurës.
Ai kishte planifikuar të mbante një fjalim në ceremoninë e hapjes së zyrës së partisë së tij në Berlin, por e anuloi pjesëmarrjen për arsye shëndetësore, raportoi agjencia gjermane e lajmeve dpa.
Trupi i Aiwanger-it u gjet të mërkurën në mbrëmje në hotelin “Neuer Fritz”, në rrugën Friedrichstrasse në Berlin-Mitte, bën të ditur “Bild”.
Kryeministri i landit të Bavarisë, Markus Söder nga Bashkimi Social-Kristian (CSU), u shpreh se është “thellësisht i tronditur” nga lajmi për vdekjen e zëvendësit të tij.
“Vdekja e papritur e Hubert Aiwanger-it është një tragjedi e vërtetë,” shkroi Söder në një postim në platformën X.
“Mendimet tona shkojnë, para së gjithash, te familja dhe fëmijët e tij. Ne ndajmë dhimbjen me ta dhe lutemi për ta.”
Kush ishte Hubert Aiwanger?
I lindur në Bavarinë e Poshtme, në Gjermaninë jugore, Aiwanger u zgjodh në Parlamentin e Bavarisë në vitin 2008 si përfaqësues i partisë “Votuesit e Lirë” dhe u bë kreu i grupit të tyre parlamentar.
Në vitin 2018, partia e tij krijoi një koalicion me partinë e qendrës së djathtë CSU – partia simotër bavareze e Bashkimit Demokristian (CDU), e cila është në pushtet. Aiwanger mbante postin e Ministrit të Ekonomisë të landit dhe atë të zëvendëskryeministrit. Aiwanger ishte fytyra e partisë “Votuesit e Lirë” (Freie Wähler) në Bavari dhe në mbarë Gjermaninë, dhe njihej për qasjen e tij luftarake.
Megjithatë, ai nuk arriti ta përsëriste suksesin e tij politik në nivelin federal, pasi “Votuesit e Lirë” nuk fituan kurrë mjaftueshëm vende për të hyrë në Bundestag, parlamentin federal të Gjermanisë.
Në javët para zgjedhjeve rajonale të vitit 2023, Aiwanger u përfshi në një skandal mbarëkombëtar, pasi gazeta “Süddeutsche Zeitung” raportoi se, gjatë kohës që ishte në shkollën e mesme në vitet ’80, ai kishte shkruar një fletushkë antisemite, e cila përmbante referenca për mizoritë e epokës naziste, siç ishte Aushvici.
Ai la pas dy fëmijë. Nuk ishte i martuar, por jetonte me Tanja Schweiger, një administratore distrikti për “Votuesit e Lirë”.
