Presidenti i Kosovës, Hashim Thaçi, ka dënuar me gjuhë të ashpër sulmin e para pak orëve në dy xhami të Christchurch të Zelandës së Re, ku u vranë të paktën 40 persona dhe u plagosën rreth 20 të tjerë.
Thaçi ka thënë se Kosova e dënon ashpër aktin terrorist, duke shtuar se në këto momente populli dhe institucione kosovare ndajnë dhimbjen me familjen e viktimave, shkruan Reporteri.net.
“Republika e Kosovës e dënon ashpër aktin terrorist në xhamitë në Christchurch të Zelandës së Re, ku u vrarë 40 persona dhe u plagosën 20 të tjerë. Në këto momente të rënda, populli dhe institucionet e Kosovës ndajnë dhimbjen me familjet e viktimave dhe shtetin mik të Zelandës së Re. Aktet e tilla dëshmojnë për domosdoshmërinë e vazhdimit të luftës kundër çdo forme të ekstremizmit dhe terrorizmit në botë”, ka thënë Thaçi.
Ndërkohë, për sulmin janë prononcuar edhe figura të shteteve të mëdha si Theresa May, kryeministre e Britanisë së Madhe, e cila dënoi ashpër sulmin në Zelandë të Re.
Ndryshe, mediat raportuan se terroristi që u fut në xhami me armë para sulmit dëgjonte muzikë serbe ku përmendej Karaxhiq, krimineli serb i njohur për krimet në Bosnje./Reporteri.net.
