Mesditen e sotme ka vdekur regjisorja Burbuqe Berisha pasi dyshohet se pësoi sulm në zemër, derisa autoambulanca kishte arritur në vendin e ngjarjes, por pa pasur mundësi t’i shpëtonte jetën.

Ky lajm ka tronditur jo vetëm familjen, por mbarë popullin që e njohën figurën e regjisores, shkruan Gazeta Online Reporteri.net.

Tani ka reaguar motra e saj, Trëndelina Berisha, ka shkruar se e ndjera ishte babë e nënë për motrat e vëllain e saj, derisa thotë se dhimbja e madhe që ka nuk përshkruhet dot.

“Motra ime, shpirti im i bardhë, ti që ishe motër, nënë e babë për ne, mua, Vjollcën dhe Dardanin. U rritëm me shumë sakrifica, pa prindërit tanë, por gjithmonë qëndruam të lidhur e të bashkuar. Krahu ynë sot u këput, ike papritmas dhe na le në pikëllim të thellë e me zemër të thyer. Nuk ka fjalë që ta përshkruajë dhimbjen që ndiejmë për humbjen tënde. Kontributi yt ishte shumë i madh jo vetëm për familjen por edhe për gjithë vendin tonë! Pusho e qetë shpirti jonë i bardhë!”, ka shkruar Trëndelina.

Gjithashtu ajo ka dhënë detaje rreth ceremonisë mortore për regjisoren.

“Ju njoftojmë se ceremonia mortore mbahet me datën 28 tetor, duke filluar me mbledhjen komemorative të organizuar nga Kolegji AAB, në teatrin “Faruk Begolli”, me fillim në orën 10:00. Pastaj nga ora 12-14, nën organizimin e MKRS, mbahen homazhe në Teatrin Kombëtar, ndërsa ceremonia e varrimit bëhet në orën 15, në varrezat e qytetit, në Prishtinë. Ditën e premte, me 29 tetor, në orën 11:00, në Teatrin Kombëtar, nën organizimin e Ministrisë së Kulturës, mbahet mbledhja komemorative, për nderimin e jetës dhe veprës së Buqes tonë. Me këtë rast falënderojmë përzemërsisht Kolegjin AAB, MKRS-në dhe gjithë shoqërinë, familjarët dhe dashamirët, që gjatë gjithë kohës ishin dhe vazhdojnë të jenë me ne duke bashkë ndarë dhembjen!”, shkroi ajo.

Për vdekjen e motrës, reagoi edhe vëllai i saj, Dardani, i cili shkroi se Burbuqe Berisha e la shumë herë.

“Ah bre motra jeme, shpirti im i bardhë, po herët na le”, shkroi ai në postimin e bërë./Reporteri.net/