Në vendin tonë 1 në 4 persona vuan nga ankthi dhe depresioni. Kjo është konstatuar nga një analizë e ekspertit të shëndetit publik Alban Ylli.

Duke e prezantuar studimin në një seancë të Komisioneve të Shëndetësisë, Ylli u shpreh se pandemia rëndoi edhe më shumë statistikat e problemeve të shëndetit mendor.

Eksperti shpjegoi se ai ka kryer një pyetësor online në vitin 2020, tek 2200 profesionistë të shëndetësisë dhe arsimit të lartë, e të dhënat kanë treguar se rreth 25% e te intervistuarve paraqitën nivel të moderuar dhe të rëndë të ankthit.

“30% u klasifikuan me depresion të moderuar dhe të rendë. Prej personave të intervistuar 6% paraqitën pagjumësi klinike, ndërsa mbi 50% kishin shenja të pagjumësisë jo klinike”, u shpreh Ylli.

Gjatë seancës Ylli theksoi se, Shqipëria është vendi me numrin më të ulët të shtrimeve, vizitave dhe ekspertëve të shëndetit mendor, në Evropë. Ai shpjegon se arsyeja e kësaj gjendje është se ka një mungesë oferte kundrejt shërbimit të problemeve mendore.

Një problem i madh sipas ekspertit, është edhe fakti se janë të shumtë njerëzit, që i vuajnë në heshtje problemet mendore, sepse kanë turp të tregojnë problemet e tyre.

“Në programin e Check-up ku ne kemi futur si pyetësor dhe komponentin e depresionit, për kapjen e shpejtë të kësaj sëmundje, por kemi vënë re se përdoret shumë pak krahasuar me komponentë të tjerë”, tha eksperti i shëndetit publik Alban Ylli.

Ai shpjegon se kjo kërkon edhe forcimin e rolit të mjekut të familjes në këtë drejtim, sipas modelit që aplikohet sot në vendet e zhvilluara.