Narges Mohammadi, një mbrojtëse iraniane për të drejtat e grave, e cila është e burgosur, fitoi të premten Çmimin Nobel për Paqe për vitin 2023.

Një nga veprimtaret kryesore të të drejtave të njeriut në Iran, Narges Mohammadi ka bërë fushatë për të drejtat e grave dhe heqjen e dënimit me vdekje.

Duke e quajtur Narges Mohammadin një “luftëtare të lirisë “, kryetarja e Komitetit Norvegjez të Nobelit Berit Reiss-Andersen, e filloi fjalimin e saj duke thënë në gjuhën farsi, fjalët për “grua, jetë, liri”, një nga sloganet e protestave paqësore kundër qeverisë iraniane.

BREAKING NEWS
The Norwegian Nobel Committee has decided to award the 2023 #NobelPeacePrize to Narges Mohammadi for her fight against the oppression of women in Iran and her fight to promote human rights and freedom for all.#NobelPrize pic.twitter.com/2fyzoYkHyf

— The Nobel Prize (@NobelPrize) October 6, 2023

“Komiteti Norvegjez i Nobelit ka vendosur t’i japë Çmimin Nobel për Paqe për vitin 2023 Narges Mohammadit, për luftën e saj kundër shtypjes së grave në Iran dhe luftën e saj për të mbrojtur të drejtat e njeriut dhe lirinë për të gjithë”, tha zonja Berit Reiss-Andersen.

Zonja Mohammadi aktualisht po vuan dënime të shumta në burgun Evin të Teheranit, që arrijnë në rreth 12 vjet heqje lirie. Akuzat përfshijnë “përhapjen e propagandës kundër shtetit”.

Ajo është nënkryetare e Qendrës Mbrojtësit e të Drejtave të Njeriut, një organizatë joqeveritare e udhëhequr nga Shirin Ebadi, fituese e Çmimit Nobel për Paqe në vitin 2003.

Çmimi Nobel për Paqe, me vlerë 11 milionë korona suedeze, ose rreth 1 milion dollarë, do të jepet në Oslo më 10 dhjetor, në përvjetorin e vdekjes së industrialistit suedez Alfred Nobel, i cili themeloi çmimet në testamentin e tij të vitit 1895.

Çmimi Nobel për Letërsi për vitin 2023 iu dha dje autorit norvegjez Jon Fosse “për dramat dhe prozën e tij novatore që i japin zë të pathënës”.

Jon Fosse e fiton Çmimin Nobel për Letërsi