Një ilaç për humbje peshe që ka fituar popullaritet në SHBA është miratuar për përdorim nga Shërbimi Kombëtar Shëndetësor në Angli.

Instituti Kombëtar për Ekselencën e Shëndetit dhe Kujdesit (NICE) arriti në përfundimin se semaglutide, e tregtuar si Wegovy, është e sigurt, efektive dhe e përballueshme, shkruan BBC.

I dhënë nëpërmjet një injeksioni në lëkurë, ilaçi i bën njerëzit të ndihen më të ngopur dhe më të kënaqur, kështu që ata hanë më pak.

Personalitete të famshme si Elon Musk pretendojnë se e kanë përdorur atë.

Ndryshimet e stilit të jetesës

Bazuar në provat klinike, NICE thotë se semaglutide mund t’i ndihmojë njerëzit të ulin peshën e tyre me mbi 10%, nëse zbatohet së bashku me të ushqyerit dhe ndryshimet e stilit të jetesës.

Ai do të rekomandohet për njerëzit që vërtetë kanë nevojë për humbje peshe, pasi mund të lidhet me gjendjen shëndetësore të tyre.

Injeksionet do të duhet të përshkruhen nga një specialist dhe një individ do të jetë në gjendje të marrë ilaçin vetëm për një maksimum prej dy vjetësh.

Semaglutide gjendet gjithashtu në ilaçin e diabetit Ozempic, por, ndryshe nga Ozempic – i cili është i destinuar për ata me diabet të tipit 2 – Wegovy rekomandohet posaçërisht për humbje peshe.

Ilaçi funksionon si një shtypës i oreksit duke imituar një hormon të quajtur peptid-1 i ngjashëm me glukagonin (GLP-1). Ky hormon i zorrëve lirohet pas ngrënies dhe zakonisht i bën njerëzit të ndihen më të ngopur, kështu që duhet të ndihmojë në uljen e marrjes së përgjithshme të kalorive.

Një artikull i botuar vitin e kaluar në Variety sugjeroi se ilaçi i diabetit Ozempic, i cili përmban semaglutide, po përdoret nga disa profesionistë në industrinë e filmit dhe argëtimit për të humbur peshë shpejt.

Është bërë aq popullor sa që aktualisht ka mungesa të gjera në SHBA dhe shqetësime për ata njerëz që mbështeten te ilaçi për arsye mjekësore.

Kompanitë e sigurimeve në SHBA po refuzojnë të mbulojnë përdorimin e tij tek njerëzit që nuk janë diabetikë dhe që nuk e marrin atë si një ilaç me recetë.

Kompania farmaceutike Novo Nordisk, e cila prodhon edhe Ozempic dhe Wegovy, thotë se produktet duhet të përdoren vetëm siç rekomandohet nga një mjek.

Ashtu si të gjitha medikamentet, semaglutide vjen me efekte anësore dhe rreziqe – duke përfshirë nauze, dhimbje stomaku, të vjella dhe diarre.

Përveç kësaj, humbja e shpejtë e peshës mund të çojë gjithashtu në humbjen e kolagjenit dhe elastinës nga lëkura, duke shkaktuar atë që Revista Vogue e ka quajtur “fytyrë ozempike”.

Kailey Wood, 36 vjeç, ka marrë Ozempic për shtatë muaj, pasi iu dha ilaçi nga mjeku i saj në Nju Jork. /Reporteri.net