Kur çdo kinema, rrjet social e platformë kritike për filma është duke folur për The Odyssey, shumë njerëzve u ka ikur një fakt mjaft interesant që ia vlen të përmendet: ndonëse pamjet për filmin janë xhiruar në Marok, Itali e Greqi, tingujt janë marrë edhe nga Shqipëria e Jugut.
Gjithçka vjen nga kompozitori Ludwig Göransson, i cili personalisht udhëtoi në rajon dhe regjistroi iso-polifoninë shqiptare dhe fyelltë e barinjve vendas.
Kështu, kombinimi ideal i tingujve të Shqipërisë së Jugut me eposin gati 3000-vjeçar të Homerit e shndërroi The Odyssey në një nga filmat më të shumëpritur në mbarë botën – e krejt kjo duke përdorur një traditë këndimi që vazhdon të jetojë në Shqipëri edhe në ditët e sotme.
Gjithçka filloi kur Göransson kërkonte një tingull që dilte jashtë kolonave zanore tipike të Hollywood-it – në kërkim të një muzike të ashpër, njerëzore dhe të lidhur ngushtë me peizazhin mbresëlënës. Ky kërkim e çoi për një javë në Shqipërinë e Jugut, në tokën ku bashkohen deti, mali dhe muzika tradicionale shekullore.
Dhe më e mira e kësaj historie është se gjithçka vinte nga përditshmëria e muzikantëve vendas, duke u dhënë regjistrimeve atë natyrshmëri që Göransson e kërkonte për filmin e regjisorit me famë botërore, Christopher Nolan.
Por, siç shkruan Themenblick, përpjekja e jashtëzakonshme nuk u kufizua vetëm te muzika. Göransson e përshkroi projektin si një sfidë të madhe, duke punuar me rreth 640 kilometra material filmik për një film që zgjat pothuajse tre orë.
Në iso-polifoninë shqiptare, këngëtarët ia nisin këngës, ndërsa një grup në sfond mban një tingull bazë të zgjatur, i njohur si iso. Zërat hyjnë njëri pas tjetrit dhe në fund bashkohen në një strukturë zanore të dendur. Kjo traditë është kryesisht e njohur në Shqipërinë e Jugut dhe është pjesë e trashëgimisë kulturore të UNESCO-s që nga viti 2008.
E pikërisht për shkak të historisë dhe lashtësisë së saj si traditë, Nolan dhe Göransson e panë Shqipërinë dhe këtë muzikë si zgjedhjen ideale për t’ua përshtatur pamjeve antike një tingull po aq antik. /Reporteri
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
