Gjatë ditës së sotme kanë ndodhur dy aksidente trafiku, njëri në Duhël të Therandës, kurse tjetri në  Vitomericë të Pejës. Aksidentet ishin fatale dhe  morën jetën e katër personave.

Pas raportimit për aksidenet ka reaguar Kryeministri Haradinaj. Ai në reagimin e tij në Facebook, shprehet i tronditur nga lajmi për humbjen e jetëve nga dy aksidenet e sotshme.

“I tronditur nga lajmi për humbjen e katër jetëve në dy aksidente të ndara sot, në Duhël të Therandës dhe Vitomericë të Pejës. Ngushëllimet më të thella familjeve, që humbën më të dashurit e tyre. Tragjeditë kaq të shpeshta e me pasoja fatale janë shqetësuese për të gjithë ne. Iu bëj thirrje qytetarëve që të respektojnë rregullat e komunikacionit dhe të vozisin me përgjegjësi, ndërsa institucioneve përgjegjëse që të ndërmarrin të gjitha veprimet adekuate në parandalimin e aksidenteve, të cilat po përgjakin rrugët e Kosovës”, ka shkruar ai.

Kujtojmë që kohët e fundit numri i aksidenteve në vend është shtuar, ndërkaq Policia e Kosovës vazhdon të bëjë apel për respektim të rregullave të komunikacionit dhe ngasje me  përgjegjësi. /Reporteri.net/