Gjermania mbështet fuqishëm dialogun midis Beogradit dhe Prishtinës me ndërmjetësimin e Bashkimit Evropian dhe pret që formati i dialogut të mbetet i pandryshuar, thotë ambasadori gjerman në Serbi, Thomas Shib, i cili në të njëjtën kohë u kërkon autoriteteve të Prishtinës të heqin taksën mbi mallrat serbe dhe ato boshnjake të vendosur në nëntor të vitit të kaluar, transmeton Reporteri.net
Shib këto komente i bëri për revistën “Diplomacy & Comerce”, duke shtuar se rezultati i dialogut duhet të jetë një marrëveshje që do të jetë gjithëpërfshirëse, e pranueshme për të dyja palët dhe e zbatueshme.
“Marrëveshja duhet të bazohet në parimet e multietnicitetit, për të siguruar të drejtat e pakicave dhe standardet demokratike dhe për të kontribuar në stabilitetin rajonal”, theksoi ai
Ambasadori përshëndeti progresin e bërë deri tani në dialog, si liria e lëvizjes, njohja e ndërsjellë e diplomave, si dhe progresi në fushën e telekomunikacionit dhe drejtësisë, i cili sipas tij përmirësoi standardin e jetesës së serbëve dhe shqiptarëve. /Reporteri.net