Arrestohet 31-vjeçari në Podujevë, dyshohet për vjedhje të rënda

Policia e Kosovës ka arrestuar një 31-vjeçar me inicialet G.O, i cili dyshohet për vjedhje të rënda.

Përmes një njoftimi, është bërë e ditur se i dyshuari është arrestuar nga njësitet policore të stacionit të Podujevës, të mbështetur edhe nga njësitë e stacionit policor në Vushtrri.

“Sot njësitet policore të stacionit të Podujevës, të mbështetur edhe nga njësite të stacionit policor në Vushtrri, kanë arrestuar një person të dyshuar. Personi i dyshuar G. O,  mashkull, 31 vjeç, shtetas i Republikës së Kosovës, ka qenë në kërkim me urdhëresa të gjykatës për vepra penale kundër pasurisë (vjedhje të rënda)”, thuhet në komunikatë.

Tutje, thuhet se Drejtoria Rajonale e Policisë Prishtinë, ka ndërmarrë të gjitha masat e nevojshme policore për të siguruar rendin dhe qetësinë publike në rajonin e Prishtinës, duke punuar me vendosmëri dhe përkushtim për kapjen e personave që dyshohen të jenë të implikuar në veprimtari kriminale, dokumentimin ligjor të veprimeve të tyre kriminale si dhe vënien e tyre para drejtësisë.

“Hetuesit policor në koordinim me institucionet përkatëse, po kryejnë veprimet e nevojshme procedurale, ndërkohë që personi i arrestuar është dërguar në vuajtje të dënimit”, thuhet në njoftim.