Në Kuvendin e Kosovës ka dështuar edhe përpjekja e 41-të për konstituim, pavarësisht konsultave që u zhvilluan qe dy ditë me Presideten Vjosa Osmani dhe Aktgjykimit të Kushtetueses, shkruan Reporteri.net.

VV ka vazhduar me përpjekjen për votim të fshehtë për zgjedhjen e Kryetarit të Kuvendit. Partitë tjera, si PDK, LDK, AAK dhe Lista Serbe s’kanë propozuar fare anëtarë për Komisionin për votim të fshehtë. Kur u ftuan për propozime, pati momente tensioni mes deputetëve të PDK’së, LDK’së dhe AAK’së dhe Kryesuesit Avni Dehari.

Deputetja e PDK’së, Arbnora Salihu, iu drejtua Deharit duke i thënë “Mos e shkel Kushtetutën”. Ai i LDK’së, Alban Zogaj tha “Kërkojmë të ktheheni ë rendin e ditës, mos e shkelni Kushtetutën”. Asaj të AAK’së, Time Kadriajt iu ndërpre fjala në gjysmë.

“Mikrofoni hapet vetëm për propozime, jo debatime”, tha Dehari.

Kur është hedhur në votim përbërja e komisionit, ata s’kanë marrë pjesë fare në proces.

Në sallë ishin 99 deputetë.

“54 deputetë për, kundër s’ka, abstenime s’ka. Ndërpritet për sot seanca. Shihemi më 05.07, në orën 11:00 sërish”, tha Dehari.

E propozuara e VV’së për këtë pozitë vazhdon të mbetet Albulena Haxhiu./Reporteri.net/.