Deputetja e LDK-së, Hykmete Bajrami ka reaguar pas paraqitjes në Gjykatën Themelore në Prishtinë të Kryeministrit në detyrë, Albin Kurti për rastin me Faton Klinakun i cili po akuzohet për kanosje. Ajo ka thënë se kur Gjykatat ose Prokuroria vendosin në favor të Kurtit apo VV-së, ato lavdërohen nga ta, në të kundërt shpallen të korruptura e politizuara, shkruan Reporteri.net.
Sipas saj, Kurti po tregon se ligji është i drejt veç kur i shërben interesave të tij personale
“Kur Gjykata Kushtetuese, gjykatat e rregullta ose Prokuroria vendosin në favor të Kurtit dhe Vetëvendosjes, ato menjëherë lavdërohen si mbrojtëse të ligjshmërisë dhe rendit në Republikë. Kur po të njëjtat institucione nxjerrin vendime që cenojnë interesat e Kurtit dhe VV-së, menjëherë shpallen të korruptuara, të politizuara dhe të manipuluara, madje edhe si vegla të Serbisë.
Prokuroria konsiderohet e pavarur dhe e drejtë vetëm kur merret me rastin “Pronto”, ndërsa kur trajton aferën “Zdravo” të dyshes Kusari-Radojiçiq, diskreditimi është i menjëhershëm. Sot, deputeti Kurti u shfaq në gjykatë si viktimë, në një rast të kanosjes. Veç paramendoni makinerinë e Kurtit dhe VV-së dhe sa kërcënime e kanosje u kanë bërë të tjerëve! Deputeti Kurti po tregon qartë se ligji është i drejtë vetëm kur i shërben interesave të tij personale”, ka shkruar Bajrami në Facebook.
Madje ajo thotë se ai e sheh drejtësinë si tavolinë suedeze, ndërsa përmendi edhe rastin e Prokurorisë që pavarësisht thirrjeve, Kurti nuk i është përgjigjur për intervistim pranë këtij institucioni.
“Ai, që mban jashtëligjshëm pozitën e Kryeministrit në detyrë, e sheh drejtësinë si tavolinë suedeze: merr çka i duhet dhe refuzon çka nuk i pëlqen. I njëjti person refuzon, përçmon dhe injoron thirrjet e Prokurorisë për të dhënë dëshmi si dëshmitar në Prokurorinë Speciale për dallaveret me rezervat shtetërore. Sot kemi probleme të mëdha socio-ekonomike, por dëmi më i madh vjen nga denigrimi i institucioneve të drejtësisë. Ata që i dëmtojnë këto institucione duhet të ndëshkohen me votë”, thotë Bajrami.
/Reporteri.net/
