Bashkimi Evropian thotë se Samiti i Berlinit shërbeu për përafrimin e Kosovës dhe Serbisë

Bashkimi Evropian, samitin e djeshëm në Berlin, e ka cilësuar si të rëndësishëm për marrëdhëniet Kosovë-Serbi.

Ka qenë zëdhënësja Maja Kocijançiq që ka thënë se takimet e Berlinit shërbyen për të afruar më shumë Prishtinën me Beogradin.

“Takimi i djeshëm prodhoi sinjale të tjera të rëndësishme në mbështetje të dialogu më të angazhuar midis Prishtinës dhe Beogradit me ndërmjetësimin e Bashkimit Evropian. Kjo është me rëndësi pasi ne mirëpresim çdo përpjekje që mbështet dialogun”, ka thënë ajo.

Kocijançiq konfirmoi se takimi më i afërt mes palëve dhe përfaqësueses së lartë për politikë të jashtme Federica Mogherini, do të jetë ai në Samitin e Bërdo Brijuanit, që do të mbahet më 8 dhe 9 maj në Tiranë.

Kujtojmë se presidenti Hashim Thaçi mbrëmë pasi përfundoi darka e liderëve bëri të ditur se më 1 korrik do mbahet një takim i radhës në Paris.

Ndërsa takimin e Berlinit e ka quajtur tejet të rëndë, ku shtoi se “emëruesi i përbashkët i takimit ka qenë që jemi pajtuar të mos pajtohemi”. /Reporteri.net/.