Për filozofin Blerim Latifi, Samiti i sotëm i Berlinit, tregon se po fillon epoka e politikës franko- gjermanë.
Ai shkruan në Facebook se qëllimi i parë i samitit të tillë, është që ‘problemet e Evropës të futen nën kontrollin franko –gjerman’.
“Epoka e vendimmarrjes konsensuale të Bashkimit Evropian duket se po merr fund. Epoka e politikës franko-gjermane po fillon. Qëllimi i parë: problemet e Evropës të futen nën kontrollin franko-gjerman. Historia po merr një kthesë interesante”, ka shkruar ai në Facebook.
Kujtojmë se kancelarja Angela Merkel deklaroi në një konferencë për media se është e nevojshme të punohet drejt gjetjes së mundësive lidhur me çështjen e Kosovës, për të cilën ka theksuar se duhet një marrëveshje e pranueshme nga të dyja palët.
“Jemi të përkushtuar për perspektiven evropiane të vendeve të Ballkanit, por kjo s’ka të bëjë me zgjerimin. Gjermania e Franca duan të tregojnë se është në interes të përbashkët që të shohim zhvillimin e Ballkanit. Në darkë do të diskutojmë se si mund ta gjejmë një zgjidhje për Kosovën dhe Serbinë. Ideja jonë është që të shohim se si të pajtohemi për t’i lehtësuar e jo vështirësuar gjerat. Nuk do të ketë ndonjë vendim sonte”, pohoi Merkel.
Kurse i pari i Francës ka kërkuar nga të dyja palët, Kosovës dhe Serbisë, që të heqin dorë nga emocionet. /Reporteri.net/.