Afganistani ka nisur një operacion ushtarak “në shkallë të gjerë” kundër pozicioneve të ushtrisë pakistaneze, si përgjigje ndaj sulmeve të fundit të kryera nga Islamabadi, kanë deklaruar zyrtarë të Talebanit.

Zëdhënësi kryesor i grupit, Zabihullah Mujahid, tha se “shumë” ushtarë pakistanezë janë vrarë dhe disa janë kapur gjatë ofensivës së nisur të enjten mbrëma përgjatë kufirit të përbashkët.

Ministria e Informacionit e Pakistanit tha se “zjarri i paprovokuar” po përballet me një “përgjigje të menjëhershme dhe efektive nga forcat e sigurisë së Pakistanit” dhe pretendoi gjithashtu për viktima të shumta në anën afgane, shkruan BBC.

Sulmi vjen pasi Islamabadi kreu sulme ajrore gjatë natës në Afganistan më herët këtë javë, për të cilat Talebani tha se kishin vrarë të paktën 18 persona.

Zëdhënësi ushtarak i Talebanit, Mawlawi Wahidullah Mohammadi, tha se “operacioni hakmarrës” u nis rreth orës 20:00 (sipas kohës lokale) të enjten.

Mujahid shkroi gjithashtu në X se “në përgjigje të shkeljeve të përsëritura të kufirit dhe kryengritjes nga qarqe ushtarake pakistaneze, u nisën operacione parandaluese në shkallë të gjerë kundër qendrave dhe instalimeve ushtarake të ushtrisë pakistaneze” përgjatë kufirit. Ai tha se forcat e Talebanit kishin kapur 15 poste ushtarake.

Qeveria e Pakistanit tha se Talebani kishte “llogaritur gabim dhe kishte hapur zjarr të paprovokuar në disa lokacione” përgjatë kufirit në provincën veriperëndimore Khyber Pakhtunkhwa.

“Raportet e para konfirmojnë viktima të shumta në anën afgane, me disa poste dhe pajisje të shkatërruara,” tha një deklaratë e Ministrisë së Informacionit dhe Transmetimeve e shpërndarë në X.
“Pakistani do të marrë të gjitha masat e nevojshme për të siguruar integritetin territorial dhe sigurinë e qytetarëve të tij.”

Kabuli kishte paralajmëruar për veprime hakmarrëse “në kohën e duhur” pas sulmeve ajrore të së dielës. Islamabadi kishte thënë se kishte shënjestruar shtatë kampe dhe strehimore të militantëve pranë kufirit, pas sulmeve vetëvrasëse të fundit në Pakistan.

Kabuli ndërkohë tha se ishin goditur shtëpi civile dhe një shkollë fetare, me gra dhe fëmijë mes viktimave.

Shkëmbimi i zjarrit vjen pasi dy vendet kishin rënë dakord për një armëpushim të brishtë në tetor, pas përleshjeve të përgjakshme në kufi, megjithëse luftime të tjera kanë ndodhur më pas.

Pakistani ishte një mbështetës i madh i Talebanit pas rrëzimit të tij në vitin 2001, pas pushtimit të udhëhequr nga SHBA-të. Por marrëdhëniet u përkeqësuan pasi Islamabadi akuzoi grupin për strehimin e Talebanit pakistanez, i cili ka nisur një kryengritje të armatosur kundër forcave qeveritare.

Sipas projektit Armed Conflict Location & Event Data, grupi ka kryer të paktën 600 sulme ndaj forcave pakistaneze gjatë vitit të kaluar.

Pakistani dhe Afganistani ndajnë një kufi malor prej 1 mijë e 600 miljesh (ose 2 mijë e 574 km).