Një 24-vjeçar, pjesëtar i Marinës Mbretërore britanike, është akuzuar për disa vepra penale në bazë të Ligjit për Sigurinë Kombëtare (NSA), pas një hetimi të zhvilluar nga Njësia e Policisë Kundër Terrorizmit në Londër.
Policia Metropolitane bëri të ditur se Teddy Young u arrestua të martën në banesën e tij në Bedfordshire dhe më pas u dërgua në paraburgim në Londër.
Sipas Shërbimit të Prokurorisë së Kurorës (CPS), Young dyshohet se gjatë periudhës nëntor 2024–maj 2025 ka ndërmarrë veprime përgatitore që lidhen me kryerjen e një vepre penale për zbulimin e informacionit të mbrojtur, në shkelje të nenit 18 të Ligjit për Sigurinë Kombëtare të vitit 2023.
Ai akuzohet gjithashtu se gjatë së njëjtës periudhë ka marrë, kopjuar, regjistruar ose mbajtur informacion të mbrojtur, me synimin që veprimet e tij t’i shërbenin interesave të një fuqie të huaj.
Sipas akuzës, ai e dinte ose duhej të kishte kuptuar në mënyrë të arsyeshme se këto veprime mund të cenonin sigurinë ose interesat e Mbretërisë së Bashkuar, në kundërshtim me nenin 1 të NSA-së.
Young vijon të mbahet në paraburgim dhe pritet të paraqitet para Gjykatës së Magjistratëve të Westminsterit gjatë ditës së sotme.
