Policia ka arrestuar ish-kreun e shërbimit të inteligjencës së jashtme të Gjermanisë, BND, August Hanning, nën dyshimet për spiunazh, njoftoi të martën Prokuroria Federale gjermane.
Hanning drejtoi BND-në nga dhjetori i vitit 1998 deri në nëntor të vitit 2005. Më pas, ai u transferua në Ministrinë Federale të Brendshme, ku shërbeu si sekretar shteti deri në nëntor të vitit 2009.
Sipas një deklarate të Prokurorisë Federale, Hanning përballet me akuza që përfshijnë spiunazh ndaj shtetit, zbulim të sekreteve shtetërore, tentativë për tradhti dhe veprimtari si agjent i një shërbimi sekret.
Në të njëjtën deklaratë bëhet e ditur se është arrestuar edhe një ish-punonjës i rangut të lartë të BND-së, i dyshuar se për më shumë se një dekadë i ka siguruar Hanningut qindra dokumente të klasifikuara në këmbim të parave.
Redaktorja kryesore politike e DW-së, Michaela Küfner, duke raportuar nga një konferencë qeveritare për shtyp lidhur me arrestimet, e përshkroi rastin si “skandali më i madh i spiunazhit të këtij shekulli në Gjermani, që po zhvillohet para syve tanë”.
Çfarë dihet për hetimin?
Sipas informacioneve të publikuara nga WDR, NDR dhe Süddeutsche Zeitung, policia e arrestoi Hanning herët të martën në banesën e tij në Nordwalde, pranë qytetit Münster, në Gjermaninë perëndimore.
Personi që dyshohet se ka bashkëpunuar me të, i identifikuar vetëm si Manfred D., në përputhje me ligjet gjermane për mbrojtjen e të dhënave personale, u arrestua në Bavari.
Autoritetet kanë kryer kontrolle në pronat e të dyshuarve, si dhe në disa ambiente në Berlin, njoftoi Prokuroria Federale.
Gjatë periudhës kur Hanning drejtonte shërbimin e inteligjencës, Manfred D. shërbente si shefi i kabinetit të tij. Më vonë, ai punoi nën drejtimin e Hanningut edhe në Ministrinë e Brendshme, deri në vitin 2009.
Manfred D. dyshohet për bashkëpunim në tentativën për tradhti dhe për spiunazh ndaj shtetit. Sipas Prokurorisë Federale, marrëveshja mes dy burrave dyshohet se është krijuar në vitin 2010.
Nga viti 2012 deri në mars të vitit 2026, Manfred D. shërbeu gjithashtu si shef kabineti i disa drejtuesve të njëpasnjëshëm të BND-së, pozicion që i mundësoi qasje në një sasi të madhe dokumentesh të klasifikuara.
Prokuroria beson se ai i ka dorëzuar Hanningut rreth 2 mijë dokumente, përfshirë materiale të klasifikuara, deri të paktën në mesin e vitit 2022.
Hetimet për rastin vijojnë, ndërsa autoritetet po përpiqen të zbardhin përmasat e plota të rrjedhjes së informacionit dhe mënyrën se si janë përdorur dokumentet e klasifikuara.
