Ish-presidenti amerikan Bill Clinton ka folur për herë të parë për një foto që është bërë shumë virale pas publikimit të dokumenteve të reja që lidhen me çështjen e Jeffrey Epstein.

Në foto, Clinton shihet duke qëndruar në një vaskë me ujë të ngrohtë (hot tub) pranë një gruaje, fytyra e së cilës është mbuluar me ngjyrë të zezë.

Gjatë një dëshmie zyrtare para Komitetit të Mbikëqyrjes në SHBA, ai tha:

“Nuk mendoj se e kam ditur ndonjëherë që është bërë ajo foto.”
Clinton shpjegoi se fotografia mund të jetë bërë në një hotel në Brunei, gjatë një udhëtimi për iniciativën e tij kundër AIDS-it. Ai tha se kishte përdorur pishinën dhe më pas ishte larguar për të fjetur, pasi ishte shumë i lodhur.

Ai tha se nuk e dinte se kush ishte gruaja e fotografuar me të, por kujton se në dhomë ndodhej edhe një agjent i Shërbimit Sekret.

Clinton theksoi gjithashtu se gruaja në foto nuk ishte nën moshën 18 vjeç dhe mohoi të ketë pasur marrëdhënie seksuale me të.

Publikimi i fundit i dokumenteve dhe fotove u bë në përputhje me ligjin “Epstein Files Transparency Act”, i cili kërkon që Departamenti i Drejtësisë të bëjë publike dhe të kërkueshme të gjitha dosjet që lidhen me hetimin për trafikim seksual ndaj Epstein. Mes materialeve të publikuara gjenden edhe fotografi ku Clinton pozon me figura të njohura të botës së artit dhe muzikës, përfshirë Mick Jagger, Diana Ross dhe Michael Jackson, për të cilët nuk ka akuza për shkelje ligjore në këtë çështje.