Gati 30 vende do të mblidhen të enjten në një përpjekje për të ushtruar presion diplomatik dhe politik për të rihapur Ngushticën e Hormuzit, një rrugë jetike detare që është bllokuar nga lufta SHBA-Izrael kundër Iranit.

Kryeministri britanik, Keir Starmer tha se takimi virtual i drejtuar nga Sekretarja e Jashtme, Yvette Cooper “do të vlerësojë të gjitha masat e mundshme diplomatike dhe politike që mund të ndërmarrim për të rikthyer lirinë e lundrimit, për të garantuar sigurinë e anijeve dhe detarëve të bllokuar dhe për të rifilluar lëvizjen e mallrave jetike.”

Sulmet iraniane ndaj anijeve tregtare, dhe kërcënimi për të tjera, kanë ndalur pothuajse të gjithë trafikun në këtë rrugë ujore që lidh Gjirin Persik me pjesën tjetër të oqeaneve të botës, duke mbyllur një rrugë kritike për rrjedhën globale të naftës dhe duke rritur ndjeshëm çmimet e saj.

SHBA nuk është ndër vendet që marrin pjesë në takimin e së enjtes, raporton AP, transmeton në shqip gazeta online Reporteri.net.

Trump ka thënë se sigurimi i kësaj rruge ujore nuk është detyrë e Amerikës dhe u ka thënë aleatëve të SHBA-së “shkoni dhe siguroni vetë naftën tuaj.”

Asnjë vend nuk duket i gatshëm të përpiqet ta hapë ngushticën me forcë ndërsa luftimet vazhdojnë dhe Irani mund të synojë anijet me raketa kundëranije, dronë, mjete sulmuese dhe mina. Por Starmer tha të mërkurën se planifikues ushtarakë nga një numër i papërcaktuar vendesh do të takohen së shpejti për të punuar mbi mënyrat për të siguruar sigurinë e transportit detar “pasi luftimet të kenë përfunduar.”

Ndërkohë, 35 vende, përfshirë Mbretërinë e Bashkuar, Francën, Gjermaninë, Italinë, Kanadanë, Japoninë dhe Emiratet e Bashkuara Arabe, kanë nënshkruar një deklaratë duke kërkuar që Irani të ndalojë përpjekjet për të bllokuar ngushticën dhe duke u zotuar të “kontribuojnë në përpjekjet e duhura për të siguruar kalim të sigurt” në këtë rrugë ujore.

Takimi i së enjtes konsiderohet një hap i parë, që do të pasohet nga “takime në nivel pune” të zyrtarëve për të përcaktuar detajet.

Starmer tha se rifillimi i transportit detar “nuk do të jetë i lehtë” dhe do të kërkojë “një front të bashkuar të forcës ushtarake dhe aktivitetit diplomatik” së bashku me partneritetin me industrinë detare.

Ideja e përpjekjes ndërkombëtare ka jehonë të “koalicionit të të gatshmëve” ndërkombëtar, i udhëhequr nga Mbretëria e Bashkuar dhe Franca, për të mbështetur sigurinë e Ukrainës pas një armëpushimi të ardhshëm në atë luftë. Ky koalicion është, pjesërisht, një përpjekje për t’i treguar administratës Trump se Evropa po rrit angazhimin për sigurinë e saj.

Urgjenca për mbrojtje më të forta kontinentale është përforcuar nga sugjerimi i ri i Trump se SHBA mund të tërhiqet nga NATO./Reporteri.net/