Franca ka vendosur t’i ndalojë Ministrit të Sigurisë Kombëtare të Izraelit, Itamar Ben-Gvir, i cili është i ekstremit të djathtë, hyrjen në territorin francez, tha të shtunën Ministri i Jashtëm Jean-Noel Barrot , duke shtuar se vendimi pasqyron zemërimin në rritje nga shumë qeveri anembanë botës për trajtimin e aktivistëve të flotiljes në Gaza.

“Që nga sot, Itamar Ben-Gvirit i ndalohet hyrja në territorin francez”, shkroi Barrot në rrjetin social X. “Së bashku me kolegun tim italian, i kërkoj Bashkimit Evropian të vendosë sanksione edhe kundër Itamar Ben-Gvir”, shtoi ai.

Qeveritë perëndimore shprehën zemërim pasi Ben-Gvir publikoi një video të vetes duke tallur aktivistët e arrestuar të flotës së Gazës, të cilët ishin të prangosur dhe të gjunjëzuar në tokë, disa prej të cilëve më vonë pretenduan se ishin sulmuar fizikisht gjatë paraburgimit.

Sjellja e Ben-Gvir u qortua nga kryeministri izraelit Benjamin Netanyahu dhe Shtetet e Bashkuara, aleati më i fortë i Izraelit. Netanyahu tha se sjellja e Ben-Gvir “nuk është në përputhje me vlerat dhe normat e Izraelit”.

Aktivistët nga flotilja, anija e së cilës u ndalua nga forcat detare izraelite në ujërat ndërkombëtare këtë javë, ndërsa po përpiqej të dërgonte ndihmë humanitare në Rripin e Gazës, janë deportuar që atëherë nga Izraeli.