Një gjykatë federale në SHBA ka vendosur se më shumë se 1 mijë punonjës të Zërit të Amerikës (Voice of America),  duhet të rikthehen në punë, të rifillojë transmetimi dhe aktiviteti i plotë i institucionit.

Vendimi i gjyqtarit të distriktit Royce Lamberth përbënte një kritikë të fortë ndaj administratës, e cila kishte tentuar në mënyrë agresive të zvogëlojë dhe riformojë VOA-n përmes Kari Lake, aleate e presidentit Donald Trump, e cila kishte shërbyer si CEO e Agjencisë Amerikane për Media Globale, shkruan Politico, përcjell Gazeta Onlien Reporteri.net.

Lamberth tha në dy vendime se veprimet e Lake për mbylljen e agjencisë shkelën ligjin federal administrativ dhe urdhëroi që punonjësit të kthehen në punë deri më 23 mars. Ai gjithashtu urdhëroi rifillimin e transmetimeve ndërkombëtare, të cilat SHBA i ka përdorur për dekada për të promovuar lirinë e shtypit në mbarë botën.

Që nga fillimi i vitit 2025, qindra gazetarë u vendosën në pushim administrativ dhe më pas u synuan për largim nga puna, me më shumë se 600 shkurtime të shpallura deri në verë dhe në fund rreth 85% e stafit të eliminuar në të gjithë agjencinë. Reduktimet ishin aq të thella sa VOA, që dikur transmetonte në pothuajse 50 gjuhë për qindra miliona njerëz, u reduktua në një operacion minimal me vetëm disa shërbime gjuhësore aktive.

“Jemi të entuziazmuar me vendimin e gjyqtarit Lamberth dhe mezi presim të kthehemi në punë,” tha Michael Abramowitz, drejtori i VOA-s, i cili ishte vendosur në pushim administrativ. “Voice of America nuk ka qenë kurrë më e nevojshme.”

Lamberth dha një kritikë të ashpër ndaj “refuzimit flagrant dhe pothuajse njëvjeçar” të qeverisë për të respektuar kërkesat ligjore të vendosura nga Kongresi, duke shtuar se Lake “i injoroi” këto kërkesa.

Më herët këtë muaj, Lamberth vendosi se Lake ishte emëruar në mënyrë të paligjshme për të drejtuar agjencinë dhe se veprimet e saj ishin të pavlefshme, duke thënë se ajo nuk kishte të drejtë të shërbente si CEO në detyrë pa konfirmim nga Senati. Ajo hoqi dorë nga ky titull më 19 nëntor.

Javën e kaluar, me kërkesë të Lamberth, agjencia njoftoi se Sarah B. Rogers do të jetë kandidatja e Trump për CEO të ri. Derisa të konfirmohet nga Senati, këtë rol do ta mbajë përkohësisht Michael Rigas.

Punonjësit që ngritën padinë, përfshirë Patsy Widakuswara, Jessica Jerreat dhe Kate Neeper, e mirëpritën vendimin.

“Jemi të gatshëm të fillojmë riparimin e dëmit që i është bërë agjencisë dhe kolegëve tanë dhe të rikthejmë besimin e audiencës globale,” thanë ata. “E dimë që rruga do të jetë e gjatë dhe e vështirë.”

Një zëdhënës i agjencisë nuk komentoi menjëherë.

Nga ana tjetër, Departamenti i Drejtësisë reagoi duke thënë se ky vendim është “një shembull i tejkalimit të kompetencave nga gjyqësori” dhe se do të vazhdojë ta sfidojë atë.

Steve Herman, ish-korrespondent i Shtëpisë së Bardhë për VOA, e quajti vendimin “një humbje të plotë ligjore” për përpjekjet për ta dobësuar Voice of America.

Megjithatë, gjyqtari nuk riktheu kontratat për rreth 600 kontraktorë të jashtëm, duke thënë se çështjet e tyre duhet të trajtohen në një gjykatë tjetër të specializuar.

Një nga avokatët e çështjes, Norman Eisen, e quajti vendimin “një refuzim të madh të veprimeve të paligjshme për të çmontuar Voice of America” dhe një mundësi për rifillim të fortë të punës së saj.