Ministri i Jashtëm i Iranit, Abbas Araghchi, ka deklaruar para diplomatëve të huaj në Teheran se situata në vend është vënë nën kontroll të plotë, pavarësisht se dëshmitë që vijnë nga terreni tregojnë për një shtypje të përgjakshme të lëvizjes protestuese.
Edhe pse autoritetet kanë bllokuar internetin për të katërtën ditë radhazi për të izoluar vendin, videot e pakta që qarkullojnë tregojnë se revolta po vazhdon në shumë qytete. Këto protesta, që nisën 16 ditë më parë për shkak të krizës ekonomike dhe rënies së monedhës, tashmë janë kthyer në një lëvizje mbarëkombëtare që kërkon rrëzimin e regjimit iranian.
Ndërkohë që regjimi përpiqet të tregojë forcë përmes marshimeve pro-qeveritare dhe propagandës në televizionin shtetëror, shifrat e organizatave ndërkombëtare janë tronditëse. Raportohet se të paktën 544 persona kanë humbur jetën, mes të cilëve shumë protestues, ndërsa mbi 10 mijë të tjerë janë arrestuar.
Dëshmitarët tregojnë se forcat e sigurisë po përdorin metoda brutale, duke fikur dritat nëpër lagje dhe duke qëlluar mbi turmën nga çatitë ose me drona. Situata është aq e rëndë sa morgjet janë mbushur plot, duke i detyruar autoritetet të përdorin magazina të thjeshta për të mbajtur trupat e pajetë të qytetarëve.
Kjo dhunë ka alarmuar ndërkombëtarët, veçanërisht SHBA-në, ku Presidenti Donald Trump ka paralajmëruar se po shqyrton opsione ushtarake shumë të forta kundër Iranit. Trump u shpreh se regjimi ka kaluar “vijën e kuqe” me vrasjen e protestuesve dhe se Amerika është e gatshme të ndihmojë popullin iranian në kërkesën e tij për liri.
Nga ana tjetër, zyrtarët iranianë janë kundërpërgjigjur me kërcënime, duke deklaruar se çdo sulm amerikan do të kthejë bazat dhe anijet e SHBA-ve në Lindjen e Mesme në objektiva legjitimë sulmi.
Në mesin e këtij tensioni, regjimi ka nisur të përdorë edhe dënimet me vdekje për të trembur qytetarët, ku ekzekutimi i parë i një protestuesi 26-vjeçar pritet të bëhet këtë të mërkurë.
Ndërkohë, figura të opozitës si Reza Pahlavi u kanë bërë thirrje forcave të sigurisë që të braktisin qeverinë dhe të bashkohen me popullin, ndërsa mijëra iranianë në mbarë botën kanë mbushur sheshet e qyteteve kryesore në shenjë solidariteti me bashkëkombasit e tyre që po përballen me plumbat në rrugët e Iranit.
