Presidenti amerikan Donald Trump ka njoftuar se Shtetet e Bashkuara do të dërgojnë 5 mijë trupa shtesë në Poloni, vetëm pak ditë pasi Pentagoni kishte pezulluar një vendosje të planifikuar forcash në vendin aleat të NATO-s.

Në një postim në platformën e tij Truth Social, Trump deklaroi se vendimi lidhet me marrëdhëniet e ngushta me presidentin aktual të Polonisë, Karol Nawrocki.

“Bazuar në zgjedhjen e suksesshme të Presidentit të tanishëm të Polonisë, Karol Nawrocki, të cilin isha krenar ta mbështesja, dhe marrëdhënien tonë me të, jam i kënaqur të njoftoj se Shtetet e Bashkuara do të dërgojnë 5,000 trupa shtesë në Poloni”, shkroi Trump.

Njoftimi konsiderohet një kthesë e fortë politike, pasi vetëm pak ditë më parë Pentagoni kishte bërë të ditur se do të vononte rotacionin e rreth 4 mijë trupave amerikane në Poloni, si pjesë e një rishikimi të pranisë ushtarake amerikane në Evropë.

Zëvendëspresidenti amerikan JD Vance e kishte mbrojtur vendimin fillestar, duke deklaruar se Evropa duhet të marrë më shumë përgjegjësi për mbrojtjen e saj. Ai theksoi se “Polonia është e aftë të mbrojë veten me shumë mbështetje nga Shtetet e Bashkuara”.

Megjithatë, pezullimi fillestar i vendosjes së trupave kishte shkaktuar shqetësim në Varshavë, mes frikës për kërcënimin rus dhe luftën e vazhdueshme në Ukrainë. Vendimi u kritikua gjithashtu edhe në Kongresin amerikan.

Zhvillimi vjen vetëm disa orë përpara takimit ministror të NATO-s në Suedi, ku sekretari amerikan i shtetit Marco Rubio pritet të marrë pjesë mes tensioneve të vazhdueshme midis Uashingtonit dhe aleatëve evropianë.

Rubio deklaroi se Trump është “shumë i zhgënjyer” nga disa vende të NATO-s që nuk kanë lejuar përdorimin e bazave të tyre për operacionet amerikane, duke veçuar Spanjën.

“Keni vende si Spanja që na mohojnë përdorimin e këtyre bazave – atëherë pse jeni në NATO? Kjo është një pyetje shumë e drejtë”, tha Rubio.

Prej kohësh, Trump ka kritikuar aleatët e NATO-s për mosrritjen e kontributit në sigurinë kolektive dhe ka ngritur pikëpyetje mbi angazhimin e SHBA-së ndaj aleancës.

Ndërkohë, Polonia vazhdon të konsiderohet një nga aleatët më të afërt të SHBA-së në Evropë, duke qenë ndër vendet me shpenzimet më të larta ushtarake në NATO dhe një mbështetëse aktive e operacioneve amerikane në Irak dhe Afganistan.