Më shumë se 300,000 punonjës, përfshirë infermierë, mjekë, mësues dhe nëpunës civilë, janë në grevë në të gjithë Republikën e Irlandës, ka raportuar BBC.
Kjo lëvizje vjen në mes të një mosmarrëveshjeje të vazhdueshme për pagat midis punonjësve të sektorit publik dhe qeverisë irlandeze, ndërsa një grevë tjetër është planifikuar për datën 21 tetor.
Pritet që shkollat të mbyllen, takimet mjekësore në spitale të anulohen dhe të ngrihen grupe protestuesish në mbarë vendin gjatë grevës 24-orëshe.
Në fund të shtatorit, më shumë se 100,000 punonjës, përfshirë infermierë, personel shkollor dhe nëpunës civilë, kaluan në masa të kufizuara pune (të njohura si “work-to-rule”), duke kryer vetëm detyrat e përcaktuara në mënyrë strikte në kontratë.
Në fillim të tetorit, mësuesit e shkollave fillore dhe të mesme në Republikë filluan gjithashtu këtë formë proteste.
Më herët, pothuajse 97% e anëtarëve të sindikatës “Fórsa” – sindikata më e madhe e shërbimit publik në Republikë – votuan në favor të ndërmarrjes së këtyre veprimeve.
Brendan O’Brien, organizator divizional i sindikatës SIPTU (e cila përfaqëson punonjësit e shëndetësisë dhe administratës në sektorin publik), kishte deklaruar më parë se “vullneti i mirë” i punonjësve ishte një faktor kyç që mbante në këmbë shërbimet publike.
