Një raport i ri i Organizatës Ndërkombëtare të Punës ngre alarmin për një krizë të heshtur globale shëndetësore të shkaktuar nga kushtet e punës.

Sipas studimit, mbi 840 mijë persona vdesin çdo vit si pasojë e rreziqeve psikosociale në vendin e punës. Faktorët kryesorë përfshijnë stresin, orët e gjata të punës, pasigurinë në punësim si dhe ngacmimet apo dhunën në ambientin profesional.

Raporti thekson se këto rreziqe janë të lidhura ngushtë me sëmundjet kardiovaskulare dhe çrregullimet e shëndetit mendor, përfshirë edhe rastet e vetëvrasjeve, raportoi Euronews.

Ekspertja e ILO-së, Manal Azzi, vlerëson se rreziqet psikosociale po shndërrohen në një nga sfidat më të mëdha për sigurinë dhe shëndetin në punë në botën moderne. Ajo thekson se përmirësimi i mjedisit psikosocial është thelbësor jo vetëm për mbrojtjen e shëndetit fizik dhe mendor të punëtorëve, por edhe për rritjen e produktivitetit dhe zhvillimin ekonomik të qëndrueshëm.

Edhe Organizata Botërore e Shëndetit vlerëson se problemet më të zakonshme të shëndetit mendor lidhen me depresionin, ankthin, çrregullimet e gjumit dhe lodhjen kronike.

Ekspertët paralajmërojnë se stresi në punë shpesh çon në sjellje të pashëndetshme, si pirja e duhanit, konsumimi i alkoolit, ushqyerja e tepërt dhe mungesa e aktivitetit fizik, duke rritur rrezikun për obezitet, hipertension dhe sëmundje të tjera kronike.

Raporti identifikon si shkaqe kryesore të dëmit në vendin e punës: orët e gjata, presionin e lartë, mungesën e balancës mes përpjekjes dhe shpërblimit, pasigurinë në punë, si dhe ngacmimet e dhunën.

Aktualisht, rreth 35% e punëtorëve në botë punojnë më shumë se 48 orë në javë, ndërsa puna mbi 55 orë në javë rrit ndjeshëm rrezikun për goditje në tru dhe sëmundje të zemrës.

Po ashtu, rreth 23% e punëtorëve në nivel global raportojnë se kanë përjetuar dhunë apo ngacmime gjatë jetës së tyre profesionale, ku forma më e përhapur mbetet dhuna psikologjike.

ILO bën thirrje për masa urgjente për përmirësimin e kushteve të punës, veçanërisht në një kohë kur digjitalizimi, inteligjenca artificiale dhe format e reja të punës po transformojnë mjedisin profesional.

Organizatat këshillohen të fokusohen në menaxhimin e ngarkesës së punës, qartësinë e roleve, numrin e stafit dhe organizimin e orarit të punës.