Sipas një raportimi të Axios, të transmetuar edhe The Guardian dhe nga media të tjera globale, administrata e presidentit amerikan, Donald Trump po konsideron të pushtojë ose bllokojë ishullin Kharg të Iranit për të shtyrë Iranin që të rihapë ngushticën e Hormuzit. 

“Ai dëshiron që Hormuzi të jetë i hapur. Nëse duhet të marrë ishullin Kharg për ta bërë këtë, kjo do të ndodhë. Nëse vendos të bëjë një pushtim bregdetar, kjo do të ndodhë. Por ky vendim ende nuk është marrë,” i tha një zyrtar i lartë i administratës Axios.

“Ne gjithmonë kemi pasur trupa në terren në konflikte nën çdo president, duke përfshirë Trump. E di që kjo është sikur fiksion, dhe e kuptoj politikën, por presidenti do të bëjë atë që është e drejtë,” tha një zyrtar tjetër i lartë amerikan. Edhe ky zyrtar tha se ende nuk është marrë asnjë vendim.

Kharg, një ishull koral pesë milje i gjatë në Gjirin Persik rreth 16 milje nga kontinenti, është një qendër kyçe për përpunimin e naftës së Iranit, përmes të cilit zakonisht kalojnë 90% e eksporteve të naftës së vendit. Ishulli ishte lënë kryesisht i paprekur nga sulmet amerikano-izraelite gjatë dy javëve të para të luftës.

Por SHBA sulmoi javën e kaluar instalimet ushtarake të ishullit, megjithëse la të paprekura objektet e eksporteve të naftës. Presidenti i SHB-së, Donald Trump, paralajmëroi se do të rishqyrtojë vendimin për të mos goditur objektet e naftës nëse Irani ose vende të tjera “bëjnë ndonjë gjë për të ndërhyrë” në kalimin e sigurt të anijeve përmes ngushticës së Hormuzit.

Ky rrugë ujore jetike është efektivisht e bllokuar që kur Irani filloi të sulmojë anijet si përgjigje ndaj sulmeve amerikano-izraelite, duke shkaktuar një rritje të madhe të çmimeve të naftës./Reporteri.net/