Lufta në Gaza “ende nuk ka mbaruar”, tha të dielën Sekretari i Shtetit i SHBA-së, Marco Rubio, duke e përshkruar lirimin e pengjeve të mbajtura nga Hamasi si fazën e parë, ndërsa detajet mbi atë që ndodh pas kësaj ende duhet të përpunohen.

Ai i tha emisionit “Meet the Press” të NBC-së se Hamasi “në thelb” kishte rënë dakord me propozimin e presidentit Donald Trump dhe kornizën për lirimin e pengjeve, ndërsa takimet ishin duke u zhvilluar për të koordinuar logjistikën e kësaj.

“Ata gjithashtu kanë rënë dakord, në parim dhe në përgjithësi, të hyjnë në këtë ide rreth asaj që do të ndodhë më pas”, ka thënë ai, shkruajnë mediat e huaja.

Ndërkohë duke folur më vonë për Fox News Sunday, Rubio tha se asgjë nuk ishte e sigurt.

“Askush nuk mund t’ju thotë se është një garanci 100%”, theksoi ai.

Rubio i tha NBC-së se SHBA-të do ta dinin “shumë shpejt” nëse Hamasi ishte serioz apo jo gjatë bisedimeve aktuale teknike për të koordinuar lirimin e pengjeve.

“Prioriteti numër një, ai për të cilin mendojmë se mund të arrijmë diçka shumë shpejt, shpresojmë, është lirimi i të gjithë pengjeve në këmbim të kthimit të Izraelit” në vijën e verdhë – ku Izraeli qëndroi brenda Gazës në mes të gushtit – tha Rubio.

Ai e përshkroi fazën e dytë të së ardhmes afatgjatë të Gazës si “edhe më të vështirë”.

“Çfarë ndodh pasi Izraeli të tërhiqet në vijën e verdhë, dhe potencialisht përtej kësaj, ndërsa kjo gjë zhvillohet? Si e krijoni këtë udhëheqje teknokratike palestineze që nuk është Hamas?”, ka shtruar pyetjen Rubio.

“Si i çarmatosni çdo lloj grupi terrorist që do të ndërtojë tunele dhe do të kryejë sulme kundër Izraelit? Si i bëni ata të çmobilizohen?”.

“E gjithë ajo punë do të jetë e vështirë, por është kritike, sepse pa këtë, nuk do të keni paqe të qëndrueshme”, shtoi ai. /Telegrafi/