Rusia ka paralajmëruar një përshkallëzim të ri të luftës në Ukrainë, duke u bërë thirrje SHBA-ve dhe vendeve të tjera që të largojnë diplomatët dhe shtetasit e tyre nga Kievi përpara një vale të re sulmesh ndaj kryeqytetit ukrainas.

Ministri i Jashtëm rus, Sergej Lavrov, gjatë një telefonate me Sekretarin Amerikan të Shtetit, Marco Rubio, i kërkoi Uashingtonit të evakuojë ambasadën amerikane në Kiev. Paralelisht, Ministria e Jashtme ruse u bëri thirrje të gjithë të huajve që të largohen “sa më shpejt të jetë e mundur” nga kryeqyteti ukrainas.

Moska njoftoi nisjen e një “fushate sistematike sulmesh” ndaj qendrave vendimmarrëse, komandave ushtarake dhe industrisë së mbrojtjes në Kiev, duke akuzuar NATO-n për mbështetje direkte në operacionet me dronë të Ukrainës kundër territorit rus.

Rusia pretendon se këto sulme janë përgjigje ndaj një goditjeje ukrainase ndaj një konvikti studentor në Starobilsk, ku sipas Moskës humbën jetën 21 persona. Nga ana tjetër, siç shkruan BBC, Ukraina ka deklaruar se forcat e saj kanë goditur një njësi elitare ruse të dronëve ushtarakë në lindje të vendit dhe se nuk kanë synuar civilë.

Gjatë ditëve të fundit, Kievi është përballur me disa sulme të rënda me raketa dhe dronë, pas përfundimit të një armëpushimi të përkohshëm që përkoi me paradën e Ditës së Fitores në Moskë. Vetëm pak ditë më parë, një sulm rus në kryeqytet shkaktoi 24 viktima, përfshirë tre fëmijë.

Më pas, Rusia raportoi viktima në rajonin e Moskës si pasojë e një sulmi ukrainas me dronë, ndërsa presidenti Volodymyr Zelensky e quajti atë një “përgjigje të justifikuar”.

Në sulmin më të fundit, Rusia përdori dhjetëra raketa balistike dhe qindra dronë, si dhe raketa hipersonike, duke goditur edhe zona civile në Kiev. Sipas raportimeve, janë dëmtuar apo shkatërruar objekte si Muzeu i Çernobilit, Muzeu Kombëtar i Artit të Ukrainës, si dhe disa qendra tregtare dhe ndërtesa banimi.

Analistët e shohin paralajmërimin rus për largimin e të huajve nga Kievi si një formë presioni psikologjik, duke qenë se sulmet ndaj qytetit janë tashmë të shpeshta që prej fillimit të pushtimit në vitin 2022.

Ndërkohë, Ukraina vazhdon të mbështetet në sistemet e mbrojtjes ajrore për të interceptuar një pjesë të madhe të raketave dhe dronëve, megjithëse shpesh numri i madh i sulmeve e mbingarkon mbrojtjen.

Presidenti Zelensky ka paralajmëruar më herët se vendi mund të përballet me mungesë të armëve të mbrojtjes ajrore për shkak të tensioneve globale dhe konflikteve të tjera ndërkombëtare.