Tërheqja e 5,000 trupave amerikane nga Gjermani, do ta kthejë numrin total përafërsisht në nivelin para pushtimit të plotë të Ukrainës nga Rusia në vitin 2022.

Sipas të dhënave të Departamentit të Mbrojtjes, në dhjetor të vitit të kaluar kishte 36,436 personel ushtarak amerikan në Gjermani, numër që renditet i dyti pas atij në Japoni, raporton CNN.

Pentagoni nuk tregoi nëse trupat do të kthehen në SHBA apo do të ripozicionohen diku tjetër. Një batalion me kapacitete zjarri me rreze të gjatë, që ishte planifikuar të dislokohej më vonë këtë vit, do të anulohet, duke ia hequr Gjermanisë mbulimin nga një kapacitet i rëndësishëm raketor.

Ish-presidenti Joe Biden miratoi dislokimin e 7,000 trupave shtesë amerikane në Gjermani në shkurt 2022, disa ditë pas pushtimit të Ukrainës nga Rusia.

Prania ushtarake amerikane në Gjermani arriti kulmin gjatë Luftës së Ftohtë, kur rreth 250,000 trupa ishin të vendosura në Gjermaninë Perëndimore.

Vende të tjera evropiane ku janë të stacionuara numra të konsiderueshëm të personelit aktiv amerikan përfshijnë Italinë, me më shumë se 12,000, dhe Mbretërinë e Bashkuar, me pak më shumë se 10,000.

Ka afro 4,000 trupa amerikane në Spanjë, por presidenti amerikan Donald Trump ka kërcënuar t’i tërheqë ato për shkak të refuzimit të qeverisë spanjolle për të lejuar përdorimin e bazave atje në luftën me Iranin.

Përveç rolit të rëndësishëm gjatë Luftës së Ftohtë, objektet amerikane në Evropë kanë shërbyer në disa kriza në Lindjen e Mesme.

Vendet evropiane presin forcat amerikane në disa baza të rëndësishme ajrore dhe detare, përfshirë bazën ajrore amerikane në Ramstein në Gjermani, RAF Lakenheath dhe RAF Mildenhall në Mbretërinë e Bashkuar, Aviano në Itali dhe Lajes Field në Azoret portugeze.

Selitë e Komandës Evropiane të SHBA-së dhe Komandës së Afrikës së SHBA-së ndodhen në Stuttgart, Gjermani, dhe ka dy objekte që mbështesin Marinën amerikane në Napoli dhe Sigonella, Itali./Reporteri.net/