Mjekët në Gaza thonë se Izraeli ka vrarë të paktën shtatë palestinezë, përfshirë një fëmijë, gjatë sulmeve ajrore të së premtes. Në këto sulme Izraeli tha se kishin në shënjestër kreun e krahut të armatosur të Hamasit.

Hamasi nuk iu përgjigj menjëherë kërkesës për koment lidhur me fatin e Izz al-Din al-Haddad, i cili u bë shef ushtarak i grupit militant në Rripin e Gazës pas vrasjes nga Izraeli të komandantit Mohammad Sinwar në maj 2025.

Kryeministri izraelit Benjamin Netanyahu tha në një deklaratë të përbashkët me ministrin e Mbrojtjes se Haddad ishte një nga organizatorët e sulmeve të 7 tetorit 2023, që çuan në ofensivën dyvjeçare të Izraelit ndaj territorit palestinez.

Ai është zyrtari më i lartë i Hamasit që Izraeli ka vënë në shënjestër me një sulm që nga marrëveshja e mbështetur nga SHBA në tetor, e cila synonte ndalimin e luftimeve në Gaza. Sulmi ndodh ndërsa Izraeli dhe Hamasi mbeten të bllokuar në bisedimet për avancimin e planit të pasluftës për Gazën, të propozuar nga presidenti amerikan Donald Trump.

Mjekët në Gaza thanë se të paktën shtatë persona, përfshirë tre gra dhe një fëmijë, u vranë dhe të paktën 50 të tjerë u plagosën nga sulmet ajrore që goditën një apartament dhe një automjet. Nuk ishte menjëherë e qartë nëse Haddad ishte mes të vrarëve.

Në deklaratën e tyre të përbashkët, Netanyahu dhe ministri i Mbrojtjes Israel Katz thanë se Haddad “ishte përgjegjës për vrasjen, rrëmbimin dhe dëmet e shkaktuara ndaj mijëra civilëve dhe ushtarëve izraelitë”.

Ata nuk thanë nëse besonin se Haddad ishte vrarë.

Mjekët në Gaza thanë se sulmi i parë ajror goditi një apartament në zonën Rimal të qytetit të Gazës, duke vrarë të paktën katër persona dhe duke plagosur disa të tjerë. Një sulm i dytë izraelit pak më vonë goditi një automjet në një rrugë pranë, duke vrarë tre persona të tjerë.

Pamjet e Reuters nga vendngjarja treguan flakë që përfshinin një apartament në një ndërtesë të shkatërruar nga bombardimet. Palestinezët u panë duke nxjerrë të paktën një trup nga rrënojat, të mbështjellë me një mbulesë plastike të bardhë.

Zëdhënësi i Mbrojtjes Civile të Gazës, Mahmoud Basal, tha se qindra njerëz jetonin në ndërtesën që u godit.

“Raketa u lëshua pa asnjë paralajmërim apo njoftim paraprak. Po flasim për një numër të madh të vdekurish dhe të plagosurish, mes tyre familje të tëra,” tha Basal.

Izraeli ka shtuar sulmet në Gaza në pesë javët që nga ndalimi i bombardimeve të përbashkëta me SHBA-të në Iran, duke rikthyer fokusin ushtarak në enklavën palestineze të shkatërruar, ku ushtria izraelite beson se luftëtarët e Hamasit po forcojnë kontrollin e tyre.

Marrëveshja e arritur tetorin e kaluar ndaloi luftimet e mëdha në Gaza pas dy vitesh lufte mes Izraelit dhe Hamasit. Por përpjekjet për të arritur një zgjidhje të përhershme kanë ngecur, pasi synojnë tërheqjen e trupave izraelite, çarmatimin e militantëve dhe rindërtimin e enklavës së shkatërruar.

Forcat izraelite ende kontrollojnë më shumë se gjysmën e territorit të Gazës, ku kanë shkatërruar shumicën e ndërtesave të mbetura dhe kanë urdhëruar largimin e banorëve.