Javën e ardhshme, më 17 dhe 18 shkurt, zyrtarë rusë, ukrainas dhe amerikanë do të takohen në Gjenevë, Zvicër, për raundin e tretë të bisedimeve trepalëshe të ndërmjetësuara nga SHBA-të, me synimin për t’i dhënë fund luftës në Ukrainë.

Ky do të jetë takimi i parë në tokë europiane, pas dy raundeve të mëparshme të zhvilluara në Abu Dhabi .

Siç shkruan The Moscow Times, lajmi u konfirmua këtë të premte nga zëdhënësi i Kremlinit Dmitry Peskov.

Ai shtoi se delegacionin rus do ta kryesojë këshilltari i Kremlinit dhe negociatori kryesor i paqes, Vladimir Medinsky.

Dy raundet e mëparshme të bisedimeve trepalëshe u zhvilluan më herët këtë vit në Abu Dhabi. Në ato takime, Admirali Igor Kostyukov, shefi i agjencisë së inteligjencës ushtarake ruse GRU, ishte përfaqësuesi kryesor i Moskës.

Ndërsa negociatat në Abu Dhabi përfunduan me një marrëveshje për shkëmbim të ri të të burgosurve, ku secila palë liroi mbi 300 robër lufte, delegacionet nuk duket se iu afruan më shumë nënshkrimit të një marrëveshjeje paqeje sesa në raundet e mëparshme.

Presidenti Vladimir Putin ka kërkuar që Ukraina të tërheqë të gjitha trupat e saj nga rajoni i Donbasit, i cili është pjesërisht i pushtuar, por që forcat ruse ende nuk e kontrollojnë plotësisht gati katër vjet pas nisjes së pushtimit në shkallë të plotë.

Presidenti ukrainas Volodymyr Zelensky e ka refuzuar kategorikisht këtë ide, pavarësisht presionit nga administrata Trump për të nënshkruar sa më shpejt një marrëveshje paqeje me Moskën.

Zyrtarë anonimë europianë dhe amerikanë i thanë Politico-s të premten se Uashingtoni i ka bërë të ditur Ukrainës se nuk do të finalizojë një marrëveshje për garanci sigurie derisa të nënshkruhet një marrëveshje paqeje me Rusinë.

Kjo do të përbënte një pengesë të madhe për Zelensky-n, i cili ka kërkuar që zgjidhja e luftës të lidhet me garanci sigurie nga Perëndimi.

Ndërkohë, revista The Atlantic, duke cituar dy këshilltarë anonimë të presidentit ukrainas, raportoi se Kievi mund të jetë i gatshëm të heqë dorë nga kontrolli i rajonit lindor të Donetskut, i cili së bashku me rajonin e Luhanskut përbën Donbasin.

Këshilltarët sugjeruan se Ukraina mund të organizojë një referendum këtë pranverë, ku qytetarët do të votojnë vetë nëse mbështesin një marrëveshje që përfshin dorëzimin e territorit.