Një tërmet me magnitudë 5.2 ka goditur herët këtë të hënë rajonin jugperëndimor të Kinës, Guangxi, duke shkaktuar dy viktima dhe duke detyruar mbi 7 mijë banorë të qytetit Liuzhou të evakuohen, ndërsa ekipet e kërkim-shpëtimit vazhdojnë punën dhe autoritetet paralajmërojnë për ndërprerje të transportit.

Sipas mediave shtetërore kineze CCTV dhe Xinhua News Agency, dy persona kanë humbur jetën dhe një tjetër është raportuar fillimisht i zhdukur, ndërsa katër persona janë dërguar në spital. Të gjithë të lënduarit ndodhen jashtë rrezikut për jetën.

Autoritetet konfirmuan se 13 ndërtesa janë shembur në orët e para të mëngjesit të së hënës. Po ashtu, rrëshqitjet e tokës të shkaktuara nga tërmeti kanë bllokuar disa rrugë në zonën e prekur.

Shërbimet hekurudhore pranë Liuzhou janë ndërprerë ose vonuar, ndërsa autoritetet po kontrollojnë sigurinë e infrastrukturës hekurudhore.

Megjithatë, furnizimi me energji elektrike, ujë, gaz dhe komunikimet raportohet se po funksionojnë normalisht në zonat e prekura.

Operacionet e kërkimit për personat e zhdukur përfunduan në mesditë, pasi një burrë 91-vjeçar i bllokuar nën rrënoja u gjet i gjallë dhe në gjendje të mirë shëndetësore, njoftuan autoritetet.

Tërmetet janë relativisht të zakonshme në jug të Kinës, megjithëse më të fuqishmit zakonisht ndodhin në zonat perëndimore malore ose drejt Tajvanit.

Një nga tërmetet më shkatërruese në historinë e fundit të vendit ishte ai i vitit 2008 në provincën Sichuan me magnitudë 7.9, i cili la mbi 87 mijë të vdekur ose të zhdukur.