Dy gra janë arrestuar dhe po mbahen në paraburgim prej një jave në Ugandë pasi dyshohet se u panë duke u puthur në publik, një akt i konsideruar si “aktivitet mes të njëjtës gjini” që mund të çojë në burgim të përjetshëm në këtë vend të Afrikës Lindore.

Wendy Faith, një muzikante 22-vjeçare e njohur si Torrero Bae, dhe Alesi Diana Denise, 21 vjeçare, u ndaluan pasi policia bastisi dhomën e tyre me qira në qytetin Arua, në veriperëndim të Ugandës, javën e kaluar.

Policia tha se kishte marrë informacione nga komuniteti se të dyja gratë ishin përfshirë në “akte të çuditshme dhe të pazakonta, të besuara si seksuale”, përveçse ishin parë duke u puthur në mes të ditës.

Gjithashtu u pretendua se shumë gra mblidheshin shpesh në banesën e tyre, gjë që çoi në arrestimin e tyre nën akuzën e praktikimit të homoseksualitetit.

The Guardian shkruan se që prej arrestimit, ato ndodhen në paraburgim dhe nuk dihet nëse apo kur do të ngrihen formalisht akuzat kundër tyre.

Presidenti autokratik i Ugandës, Yoweri Museveni, nënshkroi në maj 2023 Ligjin Kundër Homoseksualitetit, një nga ligjet më të ashpra në botë kundër komunitetit LGBTQ+, që parashikon burgim të përjetshëm për marrëdhënie mes të njëjtës gjini dhe dënim me vdekje për “homoseksualitet të rënduar”.

Organizatat e të drejtave të njeriut dhe aktivistët kanë denoncuar rritjen e rasteve të ngjashme, ku njerëzit arrestohen, ngacmohen dhe shantazhohen vetëm mbi bazën e identitetit apo marrëdhënieve të tyre.

Frank Mugisha, drejtues i organizatës “Sexual Minorities Uganda”, tha se rasti i dy të rejave është i padrejtë dhe alarmues, duke shtuar se raste të tilla po shtohen me shpejtësi në gjithë vendin.

Raporte të fundit tregojnë se qindra persona të komunitetit LGBTQ+ janë targetuar që prej hyrjes në fuqi të ligjit, duke u përballur me diskriminim, dhunë dhe pasiguri të thellë.

Aktivistët u kanë bërë thirrje autoriteteve të ndalojnë menjëherë survejimin, ngacmimin dhe arrestimet e individëve të perceptuar si LGBTQ+, ndërsa i kanë kërkuar komunitetit ndërkombëtar të mos qëndrojë indiferent ndaj situatës.