Deputeti i PSD’së, Frashër Krasniqi, ka zbuluar se Ekipi Negociator për krijimin e Platformës Shtetërore për Dialogun me Serbinë, ka angazhuar disa ekspertë të huaj në mesin e të cilëve edhe Marc Weller dhe Ben Emereson.

Këta emra, Krasniqi i ka zbuluar pas raportimeve të shumta për punësimin e të afërmeve të Shpend Ametit e Fatmir Limajt në ekipin e delegacionit shtetëror.

Sipas tij nuk mund të bëhen krahasime të stafit administrative të Ekipit Negociator të Kosovës, me ekspertët e Serbisë.

“Ekipi Negociator për krijimin e Platformës Shtetërore, ka angazhuar disa prej ekspertëve më të mirë lokalë e ndërkombëtarë për Kosovën, në mesin e të cilëve Marc Weller dhe Ben Emerson. Është e pasaktë, qëllimkeqe dhe e paskrupullt tendenca me e krahasu stafin administrativ të Ekipit tonë me ekspertët e Serbisë”, ka shkruar Krasniqi.

Sipas tij Kosova do të angazhojë ekspertët më të mirë ndërkombëtar, por nuk mund të pretendohet që edhe shoferët t’i ketë ekspertë të huaj.

“Mos u shqetësoni. Ekspertët më të mirë vendorë e ndërkombëtarë, ka me i pasë Kosova,veç mos pritni tash që edhe shoferët dhe asistentët me i pasë ekspertë ndërkombëtarë”, ka përfunduar ai.

Ben Emereson është një avokat i shquar britanik, i cili ka qenë edhe raportues në Kombet e Bashkuara në luftën kundër terrorizmit.