Komunikim të mirë dhe transparent me qytetarët në Veri të Kosovës, e ka quajtur eurodeputetja Viola von Cramon, adresimin e Kryeministrit Albin Kurti ndaj komunitetit serb për çështjen e konvertimit të targave në RKS, raporton gazeta online Reporteri.net.
“Mirë të shoh se Kryeministri i Kosovës Albin Kurti po komunikon me njerëzit në Veri të Kosovës në mënyrë transparente”, shkroi ajo në llogarinë e saj në Twitter.
Të nevojshëm, e quajti ajo, komunikimin me qytetarët për zvogëluar hendekun në shoqëri.
“Por, edhe për të zvogëluar sfidat ndër-etnike”, konstatoi Viola von Cramon.
Vetëm në këtë mënyrë, shprehet eurodeputetja, “mund të ndërtojmë besim të ndërsjellë anembanë Kosovës”.
Good to see that PM @Kurti is reaching to ppl in the North of 🇽🇰 in a transparent way.
We all need to communicate with our citizens to decrease gaps in societies but also to decrease inter-ethnic challenges.
Only so we can build mutual trust across #Kosovo.
Dobro se razumeno! https://t.co/Wv06f8jvVv— Viola von Cramon 🇺🇦🇪🇺 (@ViolavonCramon) September 1, 2022
Në një adresim të fundit në gjuhën serbe që Kurti e bëri rreth çështjes së regjistrimit të veturave në targa RKS, ai tha se “pronarët e veturave që regjistrojjnë veturat në RKS do të lirohet nga taksa dhe shpenzimet që arrijnë deri në 5 mijë euro”.
Qeveria e Kosovës ka dhënë afat prej dymuajsh që konvertimi prej targave ilegale që lëshohen nga MPB-ja serbe për veturat e serbëve në veri, siç janë “KM, PZ, UR, etj”, të konvertohen në targa të Republikës së Kosovës, RKS.
Kurti tha se targat në fjalë janë trashëgimi e lënë nga Slobodan Millosheviç, dhe se qytetarët serbë nuk duhet të rëndojnë veten me barra të lëna nga e kaluara.
Serbia në anën tjetër ka refuzuar të pranojë këtë vendim të qeverisë, dhe, siç është shprehur presidenti serb, Aleksandër Vuçiç, kjo gjë nuk do të ketë sukses.
Shefi i diplomacisë evropiane, Josep Borell, ka thënë se çështja e targave është më e vështirë, derisa vartësi i tij, Miroslav Lajçak, ka thënë se pritet që brenda dy muajve të gjendet një zgjidhje e pranueshme për të dyja palët rreth çështjes së targave.
Lajçak ka pohuar se u janë dhënë propozime të dyja palëve për çështjen në fjalë, ndonëse nuk ka specifikuar se çfarë propozimesh janë bërë, duke thënë se një gjë e tilllë është ende në negociata e sipër.