Gjatë vizitës së presidentit të Shteteve të Bashkuara të Amerikës, Joe Biden në Francë është trajtuar Ballkani Perëndimor dhe dialogu. Për raportet Kosovë-Serbi flitet në një komunikatë të përbashkët që është titulluar “Udhërrëfyesi Franko-Amerikan”.

Në njoftimin e publikuar për media, theksohet se Franca dhe Shtetet e Bashkuara mirëpresin bashkëpunimin e vazhdueshëm të ngushtë për integrimin e Ballkanit Perëndimor në Bashkimin Evropian me qëllim të rritjes së prosperitetit dhe forcimit të qeverisjes demokratike dhe sundimit të ligjit.

“Ata mirëpresin mundësinë për të forcuar angazhimin e përbashkët në Ballkanin Perëndimor, duke përfshirë bashkëpunimin ndërmjet Bashkimit Evropian (BE) dhe NATO-s, dialogun e lehtësuar nga BE-ja për normalizimin e marrëdhënieve ndërmjet Kosovës dhe Serbisë, dhe duke mbështetur reformat kyçe për integrimin në BE”, thuhet në njoftimin e Shtëpisë së Bardhë.

“Si dëshmitarë të Marrëveshjeve të Dejton-Parisit, Franca dhe Shtetet e Bashkuara riafirmojnë mbështetjen e tyre për Zyrën e Përfaqësuesit të Lartë dhe do të vazhdojnë të mbrojnë me vendosmëri sovranitetin, integritetin territorial dhe karakterin multietnik të Bosnjë-Hercegovinës. Ata u bëjnë thirrje udhëheqësve në Bosnje dhe Hercegovinë që të refuzojnë rrugën e ndarjes dhe shkëputjes dhe në vend të kësaj të punojnë së bashku për të bërë reformat e nevojshme për t’u bashkuar me BE. Ata i bëjnë thirrje qeverisë së re në Maqedoninë e Veriut që të qëndrojë e fokusuar në rrugën drejt BE-së dhe t’u përmbahet angazhimeve të tyre ndërkombëtare”, thuhet tutje në njoftim.