Lideri nacionalist i entitetit serb të Bosnje-Hercegovinës, Milorad Dodik, lajmëroi se do të nis iniciativë për shkarkimin e ministres së jashtme të BeH-së, Biserka Turkoviç, raporton gazeta online Reporteri.net.
“Për shkak të budallallëqeve që ajo ka bërë në periudhën paraprake, do të nisim iniciativë për shkarkimin permanent të saj”, shkroi Dodik në rrjetin e tij në Twitter.
Dodik, i cili assesi që nga 24 shkurti pas invazionit rus të Ukrainës nuk ka mundur të përtyp pozicionet zyrtare të Sarajevës rreth dënimit të agresionit rus, ka qenë i zëshëm në kritika ndaj Bisera Turkoviç.
Ai pretendon se Presidenca trepalëshe duhet të kontrollojë politikën e jashtme, dhe se kryediplomatja boshnjake nuk ka kapacitete për të udhëhequr politikën e jashtme të BeH-së.
Dodik, i cili është anëtari serb i Presidencës trepalëshe të Bosnje-Hercegovinës, ka lajmëruar gjithashtu se do të udhëtojë për në Moskë në shtator të këtij viti.
Madje, pak para lajmërimit për vizitën e tij në Moskë, ai u jehoi retorikave nacionaliste për pavarësimin e ‘Republika Srpska’-s nga Bosnje-Hercegovina, shkruan Reporteri.net.
Biserka Turkoviç, si kryediplomate e Bosnjes, e ka pozicionuar vendin me botën perëndimore në dënimin dhe sanksionimin e Federatës Ruse, gjë që për Dodik ka qenë e papranueshme.
Dodik njihet për mbështetjen eksplicite të presidentit të Federatës Ruse, Vladimir Putin, dhe për zëdhënie të narrativës së Kremlinit për të ashtuquajturës “operacion special ushtarak për denazifikim të Ukrainës”.
Shtetet e Bashkuara të Amerikës dhe Britania e Madhe e kanë vënë në listë të zezë nacionalistin Milorad Dodik.
Kujtojmë se Dodik haptazi kërkon kërkon shpërbërjen e Bosnje-Hercegovinës, pavarësimin e entitetit serb, riformimin e ushtrisë famëkeqe serbe të Bosnjes, tërheqjen nga të gjitha institucionet shtetërore, mohon gjenocidin e Srebrenicës, si dhe qëndron në linjat e narrativave politike të kriminelëve të dënuar të luftës, përkatësisht liderit politik Radovan Karaxhiç dhe gjeneralit famëkeq, Ratko Mlladiç./Reporteri.net/.
