Autor: Blendi Gashi
Nëntë ditë më parë ndodhi një rast i rëndë në një lokal në Zllatar të Prishtinës, ku në një ndejë të organizuar nga 15 zyrtarë policorë, njëri prej tyre mbeti i vrarë.
Të dyshuarit për vrasje, edhe ky polic, ju caktua masa e paraburgimit prej 30 ditësh, kurse pesë policëve të tjerë të arrestuar u është caktuar masa e sigurisë e arrestit shtëpiak.
Gazeta Online “Reporteri.net”, ka zhvilluar një intervistë me kryeshefin e Inspektoratit Policor të Kosovës (IPK), Kushtrim Hodaj, i cili tregon në detaje si ka ndodhur rasti, çfarë kanë gjetur në vendin e ngjarjes dhe për masat e ndërmarra deri tani.
Më poshtë mund ta lexoni intervistën e plotë me drejtorin e IPK-së, Kushtrim Hodaj, dhënë për Gazetën Online “Reporteri.net”:
Ditë më parë ndodhi një rast i rëndë ku në një ndejë u vra një polic i Kosovës. Cilat janë më të rejat për këtë rast?
Duke ju referuar kërkesës suaj ju njoftojmë se lidhur me rastin nga IPK janë arrestuar 6 zyrtarë policorë (një i dyshuar për vrasje kurse pesë të tjerë të dyshuar për shkaktim të rrezikut të përgjithshëm dhe “Përdorim i armës apo mjetit të rrezikshëm”). Bazuar në kërkesën e Prokurorisë të dyshuarit për vrasje i është caktuar masa e paraburgimit nga Gjykata kurse pesë të arrestuarve të tjerë u është caktuar masa e sigurisë e arrestit shtëpiak.
Bazuar në rekomandimet e IPK-së janë suspenduar 15 zyrtarët policorë (6 të arrestuarit dhe 9 të tjerë që kanë qenë prezent në ndejën private ndaj te cilëve IPK ka filluar hetim penal me dyshimin se të njëjtit kanë kryer veprën penal ‘mos lajmërim i veprës penale ‘).
Hetuesit e IPK-së në vendin e ngjarjes kanë sekuestruar 14 armë (revole zyrtare), 15 karikatorë me fishekë dhe disa gëzhoja që dyshohet të jenë të kalibrit 9 mm.
Që të gjitha këto pritet që në konsultim me prokurorinë të përcillen për ekzaminim balistik dhe ekzaminime të tjera në Agjencinë e Kosovës për Forenzikë.
Në këtë fazë të hetimit IPK nuk mund të shpalosë më shumë detaje për shkak të integritetit të procesit hetimor, për detaje të tjera ju lutem i referoheni Prokurorisë Themelore në Prishtinë.
Bazuar në hetimet e deritanishme, si dyshohet se ka ndodhur rasti?
Më 19.02.2022 pas mesnatës Inspektorati Policor i Kosovës ka pranuar një informacion përmes “Linjës së kaltër” nga Policia e Kosovës se ka ndodhur një incident me të shtëna me armë zjarri në fshatin Zllatar të Prishtinës ku ishte plagosur një person.
Hetuesit e IPK-së menjëherë i janë përgjigjur thirrjes kurse në vendin e ngjarjes kanë dalë edhe njësitet përkatëse policore si dhe prokurori kujdestar.
Personi i plagosur në këtë rast (zyrtar policor) ishte dërguar për trajtim mjekësor dhe pavarësisht përpjekje të mjekëve i njëjti fatkeqësisht ka vdekur si pasojë e lëndimeve.
Bazuar në hetimet preliminare fillestare dyshohet se rasti ka ndodhur në një ndejë private ku morën pjesë 15 zyrtarë policorë që të gjithë jashtë detyrës zyrtare.
Cila është e shkuara e polici që dyshohet se ka kryer vrasjen? A ka ndonjë suspendim apo diç të tillë më parë nga IPK?
Në këtë fazë të hetimit nuk mund të shpalosen këto detaje.
A keni pasur takim me drejtorin e Policisë së Kosovës për këtë rast, nëse po çfarë ju ka thënë ai?
IPK ka kontakte të vazhdueshme si me Drejtorin e Përgjithshëm ashtu edhe me grada dhe pozita të tjera dhe në vazhdimësi ka angazhime të përbashkëta për fuqizimin e integritetit policor.
Çfarë hapa do të ndërmerrni si IPK që të mos ndodhin më raste të tilla?
IPK do të mbetet e përkushtuar në ndërmarrjen e veprimeve preventive e kur plotësohen kushtet ligjore edhe represive me qëllim të fuqizimit të integritetit policor dhe rritjes së besueshmërisë së qytetarëve në Policinë e Kosovës.
Dhe një pyetje që po shtrohet shumë në opinion është nëse policët duhet të kenë armët me vete pas orarit të punës. Rregullorja e lejon një gjë të tillë, por a duhet të bëhet diç edhe në këtë drejtim?
Kjo çështje është e rregulluar me aktet nënligjore të Policisë së Kosovës dhe bazuar në këtë pyetja duhet t’i adresohet Policisë së Kosovës. /Reporteri.net/.