Kandidati i PDK-së për kryeministër, Bedri Hamza ka komentuar kandidatët e mundshëm për kryeministër për zgjedhjet e ardhshme.

Hamza ka thënë se rezultatet e Albin Kurtit si kryeministër janë të pamjaftueshme. Ai ka përmendur edhe rezultatet e dobëta në arsim, shëndetësi, transmeton gazeta online Reporteri.net.

“Mandati i parë është besim, mandati i dytë është vlerësim. Tash do të vlerësohet. Rezultatet janë të pamjaftueshme. Pa rezultate në arsim, shëndetësi, mos të flasim edhe për politikën e jashtme. Asnjë njohje. Asnjë anëtarësim”, ka thënë Hamza.

Ai ka folur për Lumir Abdixhikun e LDK-së dhe Ramush Haradinajn e AAK-së.

“Kam përvojë ma të gjatë në institucione, në vendimmarrje dhe si rezultat e njoh Kosovën para luftës, e pasluftës. E njoh para pavarësisë dhe prej vitit 2000 kam vazhdimësi, pa shkëputje dhe besoj që kjo më jep avantazhin”, ka thënë Hamza për Abdixhikun.

“Kam respekt për të kaluarën e Haradinajt. Ka kontribut të madh për lirinë e vendit. Ka qenë kryeministër në një pjesë të mandatit kur unë kam qenë ministër i Financave. Kam respekt për të. Haradinaj kësaj radhe nuk do të jetë kryeministër”, ka thënë ai për Haradinajn.