Në Kuvendin Komunal të Prishtinës tash e tutje do të zënë vend edhe 40 kompjuterë të rinj. Për blerjen e tyre janë shpenzuar mbi 33 mijë euro.

Komuna e Prishtinës, që drejtohet nga Përparim Rama, ka vendosur që t’i shpenzojë 33 mijë euro për blerjen e disa kompjuterëve të rinj.

Për këtë çështje, Kuvendi Komunal edhe ka shpallur tender.

Në njoftimin që është bërë në KRPP është treguar se tenderi “Furnizim me kompjuterë” i është besuar kompanisë “Aritech”, shkruan Gazeta Online Reporteri.net.

“Vlera e përgjithshme e kontratës: 33 320,00. Data e dhënies së kontratës: 28.04.2022. Data e planifikuar e nënshkrimit të kontratës: 07.04.2022. Numri i tenderëve të pranuar: 4”.

Pra, edhe siç është treguar, në garë për këtë tender kanë qenë katër kompani.

Në mesin e tyre ka pasur edhe kompani që kanë ofruar çmim më të lirë sesa kompania fituese, mirëpo, sipas Komunës, ata nuk kanë qenë të përgjegjshëm.

Këto argumente janë edhe në dosjen e tenderit që e ka parë Reporteri.net.

Në këtë dosje është treguar se me 33 mijë euro do të blihen gjithsej 40 kompjuterë.

Janë dhënë dhe detaje mbi përformancën e këtyre kompjuterëve, derisa është thënë se duhet të kenë garancion tri vite. /Reporteri.net/.