Mesazhi i Veselit për Samitin e Berlinit

Kryetari i Kuvendit të Kosovës, njëherësh lider i PDK-së Kadri Veseli ka lëshuar një mesazh për Samitin e Berlinit, një ditë para mbajtjes së tij.


Lideri i koalicionit qeverisës në Kosovë ka shkruar në faqen e tij në Facebook se ashtu sikur Berlini është kërthiza e Europës, edhe Kosova është kërthiza e Ballkanit.

Ai ka thënë se që të ruhen edhe njëra edhe tjetra duhet të mos jenë të ndara, por të bashkuara.

“Berlini është kërthiza e Europës. Kosova është kërthiza e Ballkanit. Që të ruhen edhe njëra edhe tjetra duhet të mos jenë të ndara, por të bashkuara. Njëra nuk mbrohet duke e dëmtuar tjetrën, por vetëm duke e respektuar, kuptuar, ndihmuar dhe mbrojtur!”, ka shkruar Veseli në faqen e tij në Facebook.

Sipas agjendës zyrtare të siguruar nga Gazeta Online “Reporteri.net”, të hënën në kuadër të këtij samiti, në ora 15:30 në Berlin pritet të arrijnë edhe udhëheqësit tjerë shtetërorë të vendeve ballkanike, përfshirë edhe presidentin e Kosovës Hashim Thaçi e Kryeministrin Ramush Haradinaj.

Agjenda nuk parasheh ndonjë takim të veçantë, sy me sy, mes liderëve kosovarë Thaçi e Haradinaj, me nikoqirët Merkel dhe Macron. /Reporteri.net/.